Ձեր վստահելի աղբյուրը

Իտալիան դարձել է առաջին եվրոպական երկիրը, որը COVID-19 առողջության անձնագրերը պարտադիր է դարձրել բոլոր աշխատողների համար: Այս մասին գրում է Euronews-ը։

Իտալիայի կառավարությունը հինգշաբթի հաստատեց նոր միջոցառում, որով պատվաստանյութերի թվային վկայականները պարտադիր են դառնում ինչպես պետական, այնպես էլ մասնավոր հատվածների համար:

Պարտավորությունը նախատեսվում է սկսել հոկտեմբերի 15-ից և ուժի մեջ կմնա մինչև տարեվերջ:

«Մենք կանաչ քարտի պարտադիր լինելը տարածում ենք աշխատանքի, հանրային ու մասնավոր ողջ ոլորտների վրա և սա անում ենք երկու հիմնական պատճառով՝ այս վայրերն ավելի անվտանգ դարձնելու և պատվաստումների մեր արշավն էլ ավելի ուժեղացնելու համար», - ասել է առողջապահության նախարար Ռոբերտո Սպերանցան:

Այս քայլը նպատակ ունի բարելավել պատվաստանյութերի ներարումներն ու նվազեցնել վարակի մակարդակը՝ այս ձմռանը COVID-19 դեպքերի հավանական աճի ֆոնին:

Բոլոր աշխատակիցներից կպահանջվի ապացուցել, որ իրենք պատվաստվել են COVID-19-ի դեմ, ապաքինվում են վարակից, կամ վերջերս վիրուսի թեստը բացասական է:

Հաղորդվում է, որ միայն թոշակառուներն ու գործազուրկ քաղաքացիները կազատվեն «կանաչ անձնագիր» կրելուց:

Յուրաքանրյուր աշխատող, ով չի ներկայացնի վավեր COVID-19 առողջության վկայական, հինգ օր հետո կկասեցվի աշխատանքից՝ առանց վարձատրության, սակայն չի կարող ազատվել աշխատանքից: Չպատվաստված անձինք կարող են նաև տուգանվել մինչև 1,500 եվրոյով:

Իտալիայի Սենատը ձայների ճնշող մեծամասնությամբ կողմ է քվեարկել այդ նախագծին, 189-ը կողմ, 32-ը դեմ և ընդամենը 2 ձեռնպահ: