Ձեր վստահելի աղբյուրը

Քաղաքական վերլուծաբան Վարդան Բալյանը գրում է.

«2020 թվականի Արցախյան պատերազմում թուրք-ադրբեջանական զինուժի կողմից մարտական գործողություններին ուղղակիորեն ներգրավված էր նաև Էրդողանի գաղտնի բանակը՝ SADAT-ը՝ մասնավոր ռազմական ընկերություն, որի գործունեությունը դիտարկելի էր նաև Սիրիայում և Լիբիայում:

Հենց այս կազմակերպությունն է զբաղվել ահաբեկչական Ջեբհատ ան-Նուսրա և այլ կառույցներից վարձու մարտիկների հավաքագրմամբ և Ադրբեջան տեղափոխումով:

Թուրքական մասնավոր բանակը հիմնադրվել է դեռևս 2012 թվականին, բայց առավելապես հայտի է դարձել 2016 թվականի Էրդողանի դեմ իրականացված հեղաշրջման ժամանակ: Ղեկավարը թուրքական բրիգադային գեներալ Ադնան Թանրիվերդին է, ում համարում են Էրդողանի  ընկերը, ով, ի դեպ, շատ մեծ ազդեցություն ունի Թուրքիայի առաջնորդի ռազմական-անվտանգային քաղաքական որոշումների վրա: Ի դեպ, հեղաշրջումից հետո նա նշանակվել էր նախագահի ռազմական խորհրդական և այդ պաշտոնը զբաղեցնում էր մինչև 2020 թվականի հունվար: Առաջիկայում այս կառույցի, նրա ղեկավարների, Մահմեդական եղբայրների հետ սրանց կապերի ու Արցախյան պատերազմում դերակատարությանը կանդրադառնամ ավելի հանգամանալից:

Հիմա ուշադրություն եմ հրավիրում այլ հանգամանքի վրա: Առիթ ունեցել եմ առաջարկելու հիմնադրել Մասնավոր ռազմական ընկերություններ ու նրանց ներգրավել մեր զինված ուժերի արդիականացման գործընթացում: Ակնհայտ է, որ ժամանակակից աշխարհում բազմաթիվ են խնդիրները, որոնց լուծման համար պետական զինվորական ստորաբաժանումների կիրառումը կարող է շատ խնդրահարույց լինել:

Արցախի հարցում ներկայում տեղի ունեցող զարգացումների համատեքստում այդ առավել քան ակնհայտ է այլևս: Հույս կապել ներկա իշխանության հետ էլ ավելի անհեռանկարային է ու անիմաստ: Մենք արդեն ավարտում ենք  ուղեղային-վերլուծական կենտրոնի կազմավորման աշխատանքները, որ պատրաստ է ակտիվորեն համագործակցել հայկական մասնավոր ռազմական ընկերությունների հետ, այդ թվում՝ իրականացնել ռազմական դիվանագիտության և ռազմական թարգամության կրթական ծրագրեր ու վերապատրաստել համապատասխան մասնագետներ:

Սեպտեմբերի 27-ից հետո գրառումների շարքով կներակայացնեմ վերջին ամիսներին մեր թիմի կողմից մշակված առաջարկությունների փաթեթը և գործողությունների ծրագիրը, որի մասնակից կարող է դառնալ յուրաքանչյուր հայրենատէր հայ»։