Ձեր վստահելի աղբյուրը

«Իրենք արյունով գնեցին մեր երկիրը, մենք թանաքով մատնեցինք այն»,- ասել է Տավուշի թեմի առաջնորդ Բագրատ եպիսկոպոս Գալստանյանն Իջևանի զորամասում հուշապատի բացման և խաչքարի օծման արարողության ժամանակ։ 

Բագրատ Սրբազանն իր ելույթում նաև ասել է. ««Պատասխանատվություն», «քաջություն», «խիզախություն», «անմահություն», «հերոսություն»․ այս բոլոր բառերը, արտահայտությունները, դժբախտաբար տկարացել ու թուլացել են այսօր։ Այսօր մնացել են միայն նրանց պատրանքները, կեղծ ձևակերպումները։...

Իրենք ոգի ի բռի՝ հրամանատարների ղեկավարությամբ, գնացին նահատակության փառքի պսակը ստանալու, ես աչքերովս տեսել եմ այդ հերոսականությունը։ Հաղթեցին թշնամուն, այն նույն թշնամուն, որի մասին առեղծվածներ են հյուսում։ Հաղթեցին այդ նույն թշնամուն, այդ նույն զինտեխնիկայով։

Այո, այսօր հիշատակի օր է, բայց «հիշատակը» չի նշանակում միայն անցյալի, մեր տղերքի գործածի մասին խոսել։ «Հիշատակը» նշանակում է նաև ուխտ կնքել նրանց առջև, թե ինչ գործողություններ ենք մենք անելու։ Ուխտ, երդում, վկայություն թող լինի այս հուշապատը՝ Հայրենիքի ամբողջականության, ծվեն-ծվեն չլինելու, փախուստ չտալու, խաբկանքներ ու պատրանքներ չփայփայելու։

Սա է պատգամը այսօրվա մեր հերոսների»։

Տավուշի թեմի ֆեյսբուքյան էջում տեղադրված է Բագրատ սրբազանի ելույթի տեսագրությունը։