Ձեր վստահելի աղբյուրը

«Ստիպված ենք փաստել, որ 30 տարի անցնելուց հետո անկախության հերոսական անցյալի մի զգալի մասի կորուստ ենք ունեցել»,-Եռաբլուրում հայտարարեց «Հայաստան» խմբակցության պատգամավոր Արմեն Ռուստամյանը և հավելեց. «Մենք այսօր, դժբախտաբար, ավելի շատ խոսում ենք կորուստների, քան ձեռքբերումների մասին, բայց հայ ժողովուրդը հույսը չի կորցրել, և բազմիցս ապացուցել է, որ ամենածանր պահին էլ կարողացել է միաբանվել և ներուժն օգտագործել»:

Ռուստամյանը հայտարարեց, որ հայ ժողովուրդը պարտավոր է այդ ուժն ևս մեկ անգամ դրսևորել՝ ապացուցելով, որ կենսունակ ազգ է և տեր է իր նախնիների ձեռքբերումներին:

«Այն հաղթանակը, որ Եռաբլուրի հերոսները մեզ նվիրեցին, մենք դրանից բավական կորցրել ենք, բայց՝ ոչ ամբողջությամբ և պարտավոր ենք նորից վերագտնել մեզ և նորից հաղթանակներ պարգևել մեր ժողովրդին»,-ասաց պատգամավորը:

Նրա խոսքով՝ քանի դեռ չի գնահատվել պատերազմի իրական պատճառները, խոսել ճգնաժամի հաղթահարման մասին անիմաստ է, քանի որ այսօր էլ մեզ նորանոր պարտվողական գործընթացներ են պարտադրվում:

Ռուստամյանը համոզված է, որ այս պայմաններում, խոսելով ճգնաժամի հաղթահարված լինելու մասին, իշխանությունները մարդկանց թմրեցնելու հերթական փորձն են անում:

«Հայաստան» խմբակցության պատգամավոր նկատեց, որ հասարակությունը 44-օրյա պատերազմի օրերի վիճակում է հայտնվել, որբ թմբիրի մեջ էին պահում իրեն՝ ասելով, թե հաղթում ենք և վերջում պարզվեց, որ պարտվում ենք, իսկ այսօր ասում են, թե խաղաղություն են ուզում և այն լինելու է ու բացվելու են հաղորդակցության ուղիները, բայց հետո կպարզվի, որ դրանք մեր ժողովրդի նվաստացման և նոր կապիտուլացիայի հիման վրա է լինելու:

«Մենք իսկապես չենք հասկանում, որ այսօրվա իշխանությունների առաջարկած ճանապարհը նշանակում է Հայաստանի թրքացում, քանի որ  քիրվայություն անելու ցանկություններով, այն, այսպես ասած, նոքյարություն է նշանակում, այսինքը պետք է նվաստացած  ապրենք»,-հայտարարեց Արմեն Ռուստամյանը:

Նրա խոսքով՝ հայ ժողովուրդը պետք է սթափվի, հասկանա, որ  չպետք է այս տարածքներում նվաստացած ապրի, այն իր պապերի ժառանգած հողերն են և հայ իր ինքնության ու գոյության խնդիրն է :

«Այ իշխանությունը գնում է խաղաղություն մուրալու ճանապարհով»,-նկատեց Արմեն Ռուստամյանն՝ անդրադառնալով Էրդողանի հետ Նիկոլ Փաշինյանի հանդիպում խնդրելու փաստին, և հավելեց. «Իսկ խաղաղություն մուրալ մեկից, որը քո ոչնչացումն է ցանկանում, պետք է լավ հասկանալ, թե այդ ի՞նչ խաղաղություն է, այսինքը՝ նվաստացած ապրել այս տարածքում: Կլինի Հայաստան, անունը կլինի, ամանումը չի լինի: Իրականում Հայաստանից բան չի մնա»,-ասաց պատգամավորը:

Արմեն Ռուստամյանը նկատեց, որ Արցախի 75 %-ը կորցրել ենք և եթե Սյունիքն էլ կորցնենք, ապա անհասկանալի գոյություն պետք է պահպանենք  տարածաշրջանում և կհատնվենք աշխարհաքաղաքական պարկի մեջ, իսկ այդ դեպքում Հայաստանն իրենից գործոն չի ներկայացնի և կդառնա գործիք այս կամ այն երկրի ձեռքում:

«Այսօր մենք խոչընդոտում ենք խաղաղություն մուրալուն, որովհետև գիտենք, թե այն ուր է տանում, մենք ասում ենք պետք է արժանապատիվ խաղաղություն, որը նշանակում է պարտադրել խաղաղոըթյուն, որի ուժն ու կարողությունը Հայաստանը ունի, թե ներքին, թե արտաքին առումով»,-ասաց Ռուստամյանը և շեշտեց, որ կան բարեկամ ժողովուրդներ, որոնց ձեռնտու չէ, որ Հայաստանը կորցնի իր աշխարհաքաղաքայան նշանակությունը:

Նա հայտնեց, որ ամեն անգամ իշխանությունը իր քայլերը հիմնավորում է ժողովրդի տված մանդատով, իսկ ընդդիմությունը համոզված է, որ այդպես չէ՝ ժողովուրդը չի ուզում այն, ինչ անում է իշխանությունը, այդ պատճառով էլ «Հայաստան» դաշինքն այդ ճշմարտությունը պետք է ապացուցի փողոցում մեկնարկվելիք պայքարի միջոցով: