Ձեր վստահելի աղբյուրը

Հինգ օրից ավելի է  «Արևիկ» ազգային պարկում հրդեհաշիջման աշխատանքներ են տարվում։ Արտակարգ իրավիճակների նախարարությունից պարբերաբար հայտնում են, որ աշխատանքները շարունակվում են, ուղղաթիռ է ընդգրկվել: Մեղրի համայնքի ղեկավար պաշտոնակատար Արարատ Թումանյանը հայտնում է, որ ցեմենտի պարկեր են բարձում, ուղղաթիռից պարկերը նետում են անտառներում կրակի օջախների վրա, բավական արդյունավետ միջոց է։

«Արդեն երկու ռեյս արել են, դրական արդունքներ են ֆիքսվում»,- ասում է նա։

Բնապահպան Սիլվա Ադամյանը Panorama.am-ի հետ զրույցում հրդեհը մարելու այս տարբերակը գնահատեց անթույլատրելի, սխալ մոտեցում, որն անդառնալի վիճակ կարող է ստեղծի։

«Բազմիցս ելույթ եմ ունեցել, դեռ նախկին իշխանության օրոք ենք բարձրաձայնել, երբ Խոսրովի արգելոցում հրդեհի հետ կապված լուրջ խնդիրներ կային, երբ ցեմենտի պարկերով ցեմենտն  ուղղակի լցնում էին հրդեհի վրա, քանի որ այլ միջոցներ, հնարավորություներ չունեին, հատուկ ինքնաթիռներ չունեին ջրով մարելու համար»,- ասաց բնապահպանը։

Ըստ Ս. Ադամյանի, կրակը մարելու միջոց է նաև ավազը։

«Մեր հրշեջ ծառայությունը հրաշալի գիտի, թե ինչ թույլատրելի միջոցներ կան։ Ցեմենտը թույլատրելի է այն տարածքներում, որտեղ չկա բուսականություն։ Պատկերացնում եք՝ այդ տարածքներում, որտեղ արդեն փորձել են ջրի միջոցով մարել ու չի ստացվել, ցեմենտով են ուզում մարել։ Ցեմենտն ամրանում է այդ տարածքում, եթե այն մաքրելու միջոցառումներ չարվեն, իսկ ես խիստ կասկածում եմ, որ հիմա հատուկ  միջոցառումներ կարվեն տարածքի մաքրման համար, ինչը բավականին բարդ գործ է, որպեսզի բուսականությունը, հողի վերին շերտը չվնասվի»,- նշեց նա։

Սիլվա Ադամյանի խոսքով, սա շատ լուրջ խնդիր է. «Որպես բնապահպան, ինձ համար տարօրինակ ու զարմանալի է, որ այսքան խոսելուց հետո՝ նախկինում և հիմա, ասելով, որ անթույլատրելի պրոցես է, հիմա էլի այդպես են փորձում մարել։ Երկիրը պատրաստ չէ արտակարգ իրավիճակներին, համայնքապետերն անգրագետ ձևով, հաշվի չառնելով բնապահպանական խնդիրները, ինքնագլուխ գործողություններ են կատարում, մենակ թե հրդեհը մարի, չհասնի գյուղերին։

Հասկանալի է, որ պետք է մարվի հրդեհը, բայց ի՞նչ միջոցներով։  Եթե այսպես շարունակենք,  Խոսրովի արգելոցը, «Արևիկ» ազգային պարկը կամ այլ անտառային տարածքների մեծ մասը կկորցնենք կամ տարիներ շարունակ այնտեղ բուսականությունը դժվար կաճի, տեղեր կլինեն՝  ընդհանրապես չեն աճի»։

Նա հիշեց, երբ Խոսրովի արգելոցում բռնկված հրդեհի ժամանակ դժգոհություն էին հայտնել ցեմենտով մարման գործողության դեմ, համապատասխան մարմիններն ասել էին, որ սխալ էին արել, փոխարինել էին ջրով ու ավազով, ինքնաթիռ էին վարձել ջրով մարելու համար։

«Այս պարագայում թույլ են տվել հրդեհն անցնի մեծ տարածքներ, մեծ վնաս է տրվել։ «Արևիկ» ազգային պարկը հրաշալի կենսաբազամազնություն ունի, կուսական տեղեր կան։ Այսպիսի վերաբերմունքը բացարձակ անթույլատրելի է»,- ասաց Ս. Ադամյանը։

Նա նշեց, որ իր համար արդեն զարմանալի ոչինչ չկա, միայն զայրանում է։

«Ինչ տեղի ունեցավ վերջին երեք տարիներին, արդեն բոլորովին չեն զարմացնում, բայց զայրացնում են։ Բոլոր բնապահպանական խնդիրներում առաջ են քաշվում այնպիսի որոշումներ, լուծումներ, որոնք բացարձակ մասնագիտական հիմք չունեն իրենց տակ։ Սա ոչ միայն վերաբերում է հրդեհներին, օրինակ, նաև Սևանա լճի խնդրին։ Փաստացի ոչ մի հարց մինչև վերջ չի լուծվում»,- ասաց Սիլվա Ադամյանը։