Ձեր վստահելի աղբյուրը

«Վստահ եմ, որ մեր պետությունը դուրս կգա այս իրավիճակից, և մենք կունենանք այն երազած հայրենիքը, որի համար պայքարել ենք և դեռ շատ անելիք ունենք»,- լրագրողների հետ զրույցում հայտարարեց ՀՀ ԶՈւ Գլխավոր շտաբի պետ Արտակ Դավթյանը։

Նա նշեց, որ երազած հայրենիք ունենալու համար նախադրյալները կան։

Գորիս-Կապան ճանապարհահատվածում ստեղծված իրավիճակի վերաբերյալ հարցերին, մասնավորապես այդ ճանապարհին անձինք են անհետանում, ասվում է՝  շեղվել են ճանապարհից, այդ անձիքն կարո՞ղ էին շեղվել ճանապարհից. նա պատասխանեց. «Այդ անձանց հարցն ուղղեք»։

Ա. Դավթյանը հրաժարվեց որևէ մեկնաբանություն տալ Գորիս-Կապան ճանապարհահատվածում ստեղծված իրավիճակի վերաբերյալ՝ նշելով, որ այդ հարցով մեկնաբանություններ շատ են արվել, քանի որ  պաշտպանության նախարարության, Զինված ուժերի հետ անմիջական առնչություն չունի,  չի մեկնաբանում։

«ԱԱԾ-ն այդ ճանապարհի առնչությամբ հանդես է եկել հայտարարությամբ, ընդունեք ի գիտություն, ԳՇ-ն մեկնաբանություն չունի»,- նշեց նա՝ ի պատասխան հարցին, թե Գորիս-Կապան ճանապարհը, որտեղ այսօր կան ադրբեջանիցները, մե՞զ է պատկանում։

Հարցին, թե ինչպե՞ս այսօր ՀՀ քաղաքացին վստահ լինի, որ անվտանգ երկրում է ապրում, Սյունիք գնալուց առաջ մտորում է՝ գնալ, թե ոչ, ԳՇ պետը նշեց, որ մտորելու խնդիր չի տեսնում Սյունիք գնալու հետ կապված։

Արտակ Դավթյանը նշեց, որ երթևեկել է Գորիս-Կապան ճանապարհով, երթևեկությունն անցել է նորմալ. «Եթե գնացել-եկել եմ, ուրեմն...»։