Ձեր վստահելի աղբյուրը

«Այս տարի լրանում է տեղական ինքնակառավարման ներկայիս համակարգի 25-ամյակը, որը հիմնված էր համայնքի ղեկավարի ուղիղ ընտրական և պատասխանատվության մեխանիզմի վրա»,- «ՀՀ վարչատարածքային բաժանման մասին» օրենքում փոփոխություններ կատարելու մասին նախագծի վերաբերյալ խորհրդարանական լսումների ժամանակ հայտնեց «Հայաստանի համայնքների միության» նախագահ Էմին Երիցյանը և նկատեց, որ առաջարկվող փոփոխությամբ իրականացվում է վարչատարածքային և ընտրական համակարգի միասնական փոփոխոություն, որը պետական շինարարության ֆունդամենտալ խնդիր է:

Նա պնդեց, որ պետք է պատասխանել այն հարցին, թե ի՞նչ իրավիճակում ենք հայտնվում, երբ ունենում ենք մեկ պետություն և 78 համայնք և եթե լիազորություններ կամ ֆինանսներ չենք տալիս՝ այդ համայքները կարո՞ղ են լինել ավելի ուժեղ:

«Վարչատարածքային փոփոխությունները կառավարության քաղաքական մեծամասնության բացառիկ իրավասությունն է, բայց այն չի նշանակում, որ այն չպետք է կոնսենսուսով և հասարակական համաձայնությամբ իրականացվի»,- հայտնեց Երիցյանը:

Նրա խոսքով՝ Տեղական ինքնակառավարման եվրոպական խարտիայի 5-րդ հոդվածը և ՀՀ Սահմանադրությունը սահմանում են որոշակի ընթացակարգ համայնքի կարծիքը լսելու համար:

«Մենք գործ ունենք իրավական գործընթացի խախտման հետ, երբ համայնքի կարծիքը լսելու մեխանիզմները չեն ապահովվում»,- նշեց համայնքների միության նախագահը և կոչ արեց, որ նախագծին կցվեն համայնքների և ավագանիների ներկայացրած դիրքորոշումները, որպեսզի որոշումներ կայացնելիս պատգամավորները դրանք հաշվի առնեն:

Նրա խոսքով՝ ՍԴ որոշումը ռիսկեր է առաջացնում խոշորացման գործընթացի համար, երբ սահմանվել է «հանրային շահ» հասկացությունը, որը ենթադրում է համայնքի բնակիչների կարծիքի լսում:

Ըստ Երիցյանի՝ օրենքի նախագծում պետք է հստակ ամրագրվի հանրային շահը, որպես տեղական իշխանությունների իրավունքների առաջ մղող գործոն:

«Մենք միշտ համարել և համարում ենք, որ Հայաստանում թիվ 1 օրակարգը տեղական ինքնակառավարման ապակենտրոնացման հարցն է, և երբ նախագծի հիմքում դրվում է ապակենտրոնացումը որպես հանրային շահ, հանուն որի տեղի է ունենում վարչատարածքային բարեփոխումները, ապա խոսակցությունը բովանդակություն և շարունակություն է ստանում, եթե այն չի դրվում նախագծի հիմքում, ապա ունենում ենք ընդամենը վարչատարածքային փոփոխություն, որից հետո սկսում ենք ակնկալել, որ բարի կամքի դրսևորմամբ ռեֆորմներ կիրականանան»,- հայտարարեց Էմին Երիցյանը