Ձեր վստահելի աղբյուրը

ԱԺ պաշտպանության և անվտանգության հարցերի մշտական հանձնաժողովն այս պահին ցուցաբերում է բացարձակ անգործունակություն, չի իրականացնում պատշաճ  խորհրդարանական վերահսկողություն, չի կանչում հաշվետվության կառավարության և իշխանության մարմիններին, որոնք ուղղակի պատասխանատու են սահմանների անխախտելիության, տարածքային ամբողջականության, արտաքին անվտանգության համար: Հանձնաժողովի նիստից հետո լրագրողների հետ զրույցում ասաց հանձնաժողովի անդամ, «Հայաստան» խմբակցության պատգամավոր Արթուր Ղազինյանը:

«Ես եկել էի աշխատանքային մթնոլորտում քննարկելու Հայաստանի սահմաններին, հատկապես Սյունիքի սահմանամերձ գոտում տիրող իրավիճակը, քանի որ Հայաստանի արտաքին սահմաններին տիրում է  ողբալի իրավիճակ,  ամեն օր լսում ենք թշնամու նոր առաջխաղացման, Հայաստանի ինքնիշխան տարածք մխրճվելու մասին, սակայն հանձնաժողովի նախագահն ու իշխանության անդամները մերժեցին սահմանային իրավիճակը քննարկելու վերաբերյալ իմ առաջարկությունը»,-  նշեց նա:

Այսօր Ա. Ղազինյանը չորրորդ անգամ չընտրվեց  ԱԺ պաշտպանության և անվտանգության հարցերի մշտական հանձնաժողովի նախագահի տեղակալի պաշտոնում: Հանձնաժողովի իշխանական անդամները դեմ էին նրա թեկնածությանը:

«Ինձ համար իրականում առանձնապես պատվաբեր չէ Անդրանիկ Քոչարյանի տեղակալը լինելը, մեծ հաճույք չէ, բայց սա  ընդդիմության գործառույթ է, որն այս պահին դրված է իմ վրա, «Հայաստան» խմբակցությունը որոշել է առաջադրել իմ թեկնածությունը:

Մեկ ամիս ձևավորված է հանձնաժողովը, չորս արտահերթ նիստ է եղել,  բացի մեկ հարցից որևէ այլ հարց օրակարգ չի բերվել: Իշխանությունը անգործունակ է»,- նշեց ընդդիմադիր պատգամավորը:

Նա ասաց, որ իրենք այսօրվա առաջարկությամբ՝ քննարկել սահմանային իրավիճակը, փորձեցին գոնե բովանդակության տիրույթ վերադարձնել հանձնաժողովի աշխատանքները. «Իշխանությունը դեմ քվեարկեց, ասելով, որ հանձնաժողովի անդամներից մեկը գտնվում է,  իրենց բառերով, Զանգեզուրում, մեր բառերով՝ Սյունիքի մարզում: Տեղեկացրեք պարոն Քոչարյանին օգտագործի Հայաստանի օրենսդրությամբ տեղանունները, իրենց մոտ նորմ է դարձել ադրբեջանական լեքսիկոնի  օգտագործումը մեր խորհրդարանում: Թող կոռեկոտ ու զգույշ լինեն»:

Նրա խոսքով, այսօր իշխանության կողմից սաբոտաժ է արվում հաձնաժողովի բնականոն աշխատանքը:

«Մենք փորձեցինք բերել  բովանդակության դաշտ, քանի որ այն մարտահրավները, որոնք այսօր կանգնած են  Հայաստանի արտաքին անվտանգության սահմանների անխախտելիության և ինքնիշխանության առումով ուղղակի անհամեմատելի են այսօր օրակարգում ընդգրկված մեկ հարցի հետ»,- նշեց Ա. Ղազինյանը:

Նա նշեց, որ այսօր Գորիս-Կապան ավտոճանապարհն անվտանգ չէ,  ինչը ցույց տվեց ժամանակը, անցած 2-3 շաբաթվա ընթացքում ադրբեջանցիների լկտի վարքագիծը, որոնք այնտեղ գտնվում են Փաշինյանի անձնական հրավերով, այդ ճանապարհով երթևեկելը կյանքի ու առողջության համար լուրջ սպառնալիք է:

«Հայաստան» խմբակցության անդամը նաև ընդգծեց, որ Սովետական Հայաստանի սահման գոյություն չի ունեցել և չունի, դա եղել է Խորհրդային միության մեջ երկու  հանրապետությունների վարչական սահման, իսկ պեական սահմանի մասին օրենքը հստակ սահմանում է  այն ընթացակարգը, որով պետք է տեղի ունենա սահմանների սահմանագծումն ու սահմանագծումը, այնտեղ չկա GPS սարք, բանավոր փոխըմբռնումը որպես ընթացակարգ նախատեսված չէ:

«Հետևաբար տեղի է ունեցել ՀՀ  օրենսդրության կոպտագույն խախտում, որն իր հետևից բերել է  լիազորությունների  վերազանցում, Հայաստանի տարածքային ամբողջականության դեմ ուղղված գործողություն, պետական դավաճանություն:

Այդ մասին ես խոսեցի հանձնաժողովի նիստին: Ըստ երևույթին, նրանց այդ բորբոքված վիճակը պայմանավորված է  նաև այն հանգամանքով,  որ ես իրենց ուղիղ տեքստով մեղադրեցի հանցագործություն կատարելու մեջ»,- ասաց Արթուր Ղազինյանը: