Ձեր վստահելի աղբյուրը

«Երաժշտություն հանուն ապագայի» հիմնադրամի նախաձեռնությամբ` հիմնադրամի կրթաթոշակառուները մասնակցոմ են սեպտեմբերի 4-23-ը ԱՄԷ-ի Դուբայ քաղաքում անցկացվող Մերձավոր Արևելքի դասական երաժշտության ակադեմիայի (Middle East Classical Music Academy) կազմակերպած վարպետության դասերին։ Բացի այդ, պատանիները հանդես են գալիս իրենց  կատարումներով:

Middle East Classical Music Academy-ն անցկացվում է InClassica միջազգային երաժշտական փառատոնի (օգոստոսի 28-ից սեպտեմբերի 26-ը) շրջանակներում, որը կազմակերպվել է Մշակույթի աջակցության եվրոպական հիմնադրամի (European Foundation for Support of Culture / EUFSC) նախագահ Կոնստանտին Իշխանովի և SAMIT Event Group-ի նախաձեռնությամբ:

Ինչպես Panorama.am-ի հետ զրույցում նշեց «Երաժշտություն հանուն ապագայի» հիմնադրամի տնօրեն Աննա Տեր-Հովակիմյանը, մասնակից կրթաթոշակառուները Երևանի երաժշտական և արվեստի դպրոցների, երաժշտական քոլեջների լավագույն աշակերտներն են, որոնք հաղթել են հիմնադրամի կողմից հայտարարած մրցույթում։

Նրա խոսքով, հիմնադրամի տասը կրթաթոշակառուները՝ Դավիթ Բոյաջյանը (ջութակ), Ասյա Անիսիմովան (ջութակ),  Մարի  Հակոբյանը (թավջութակ), Հայկ Հեքեքյանը (հոբոյ), Տիգրան Գասպարյանը (հոբոյ),  Դավիթ Տոնոյանը (ֆագոտ), Սաթենիկ Գալստյանը (գալարափող), Միհրան Առաքելյանը (շեփոր), Սամվել Դավթյանը (տրոմբոն) եւ  Գուր Սարգսյանը (դաշնամուր) սեպտեմբերի 5-ին Դուբայում կատարել են Էդվարդ Միրզոյանի «Վալսը» և Արամ Խաչատրյանի «Այշեի պարը» «Գայանե» բալետից»։

Իսկ Հայաստանի պետական սիմֆոնիկ նվագախմբի հետ սեպտեմբերի 4-ին և 5-ին իրենց կատարումներով հանդես  են եկել հիմնադրամի կրթաթոշակառուներ Մարի Հակոբյանը, Ասյա Անիսիմովան, Գուր Սարգսյանը, Հայկ Հեքեքյանն ու Դավիթ Բոյաջյանը:

Հիմնադրամը կազմակերպել է նաև 6 դաշնակահարների`Արիանա Կարապետյանի, Աստղիկ Ղուկասյանի, Մարգարիտա Միքայելյանի, Գառնիկ Մսրյանի, Վալերի Պոլոյանի և Մարի Փոշոտյանի մասնակցությունը Մերձավոր Արևելքի դասական երաժշտության ակադեմիայի դասընթացներին: Բացի այդ,  դաշնակահարուհի Աստղիկ Ղուկասյանը, InClassica միջազգային երաժշտական փառատոնի շրջանակներում, հանդես է եկել Կալինինգրադի սիմֆոնիկ նվագախմբի հետ:

Հիմնադրամի տնօրենի խոսքով,  պատանիները հնարավորություն ունեն մասնակցելու ոչ միայն անվանի երաժիշտների՝ աշխարհահռչակ ջութակահար Մաքսիմ Վենգերովի, հայազգի ջութակահարներ Սերգեյ Խաչատրյանի, Հայկ Կազազյանի, դաշնակահար Պավել Գիլիլովի և այլ հայտնիների վարպետության դասերին, այլև ունկնդրել InClassica միջազգային փառատոնի բոլոր համերգները, որոնց մասնակցում են համաշխարհային ճանաչում ունեցող կատարողներ, 8 առաջատար նվագախմբեր, 12 դիրիժորներ։

Աննա Տեր-Հովակիմյանը խոստովանում է՝ երբ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանի հետ ստեղծում էին այս հիմնադրամը, նպատակը մեկն էր՝ աջակցել շնորհալի, տաղանդավոր պատանի երաժիշտ-կատարողներին՝ խթանելով նրանց մասնագիտական ունակությունների զարգացմանը։

Արդյունքում, ըստ նրա, ստեղծվեց մի հիմնադրամ, որն այսօր աջակցում է երաժշտական դպրոցներում սովորող պատանի երաժիշտներին, տրամադրում է կրթաթոշակ։ «Իհարկե  հիմնական  նպատակն այն է, որ պատանիների համար կազմակերպվեն տարբեր տեսակի վարպետության դասեր ինչպես Հայաստանում, այնպես էլ արտերկրում, որպեսզի երեխաները հնարավորություն ունենան մասնակցել երաժշտական փառատոնների, որտեղ կկարողանան ծանոթանալ աշխարհահռչակ երաժիշտների, կոմպոզիտորների, երաժշտության բնագավառում ճանաչում ունեցող մարդկանց հետ»,- ասաց Հիմնադրամի տնօրենը։

Աննա Տեր-Հովակիմյանը միաժամանակ նշեց, հիմնադրամի գործունեությունը ընդլայնվելու է, կան հստակ ծրագրեր, որոնք պետք է առաջիկայում կյանքի կոչվեն։ Իսկ ծրագրերից մեկն այն է, որ մարզերում ապրող որևէ տաղանդավոր երեխա հետ չմնա մայրաքաղաքում ապրող երեխաներից, նրանք նույնպես պետք է ստանան լիարժեք երաժշտական կրթություն։

«Երբ սկսեցինք մեր գործունեությունը, հասկացանք, որ կրթաթոշակի համար հիմնական հայտերը ստացվում են մայրաքաղաքից։ Իրականում մեծ անելիքներ ունենք մարզերում, քանի որ կան տաղանդավոր երեխաներ, որոնք հնարավորություն չունեն լիարժեք երաժշտական կրթություն ստանան։ Բոլորս էլ գիտենք, որ մարզերի երաժշտական դպրոցները զիջում են Երևանին, չկան գործիքներ, համապատասխան մասնագետներ։

Մրցույթների ժամանակ տեսնում ենք, որ, օրինակ, Չայկովսկու, Սպենդիարյանի, Սայաթ Նովայի և այլ երաժշտական դպրոցների երեխաները շատ ավելի լավ երաժշտական կրթություն ունեն, քան մարզերի երեխաները։ Մենք պետք է նրանց աջակցենք»,- ասաց Աննա Տեր-Հովակիմյանը՝ հավելելով, որ նախատեսվում է մարզաբնակ երեխաների համար ևս մաստեր-կլասներ անցկացնել։

Ի  դեպ հիմնադրամի կրթաթոշակառուները ոչ միայն վարպետության դասընթացների են մասնակցում, այլև կարևորելով նրանց ընդհանուր կրթական մակարդակը, հիմնադրամը կազմակերպում է ռուսերենի և անգլերենի դասընթացներ, որ երեխաները դասախոսությունների ժամանակ հասկանան տարբեր երկրներից ժամանած երաժիշտներին, ընկալեն և հաղորդակցվեն նրանց հետ։ 

Հիշեցնենք, որ «Երաժշտություն հանուն ապագայի» հիմնադրամի կրթաթոշակառու կարող են դառնալ 10-17 տարեկան երեխաները։ Նրանք մեկ տարի ստանում են 100 եվրոյին համարժեք կրթաթոշակ։