Ձեր վստահելի աղբյուրը

«Երբ քննարկել եք այդ կետերը՝ անտեսել, ոտնահարել եք ազգային փոքրամասնությունների իրավունքները: Խոսքը գնում է Արտաշատի և Մեծամորի փնջի երկու ասորական գյուղերի՝ Դիմիտրովի և Նոր Արտագերսի մասին, որոնք այս խոշորացման ծրագրի իրականացման հետևանքով ոչնչացման եզրին են հայտնվել»,- խորհրդարանական լսումների ժամանակ  դիմելով տարածքային կառավարման և ենթակառուցվածքների փոխնախարար Վաչե Տերտերյանին՝ ասաց Հայաստանի ասորական համայնքի ներկայացուցիչ Իրինա Գասպարյանը:

Վերջինս ընթերցեց ՀՀ ազգային անվտանգության ռազմավարության ծրագրի ազգային փոքրամասնություններին վերաբերող բաժինը և վստահեցրեց, որ ազգային փոքրամասնությունների շահերի պահպանման այդ կետերը գոյություն չունեն առաջարկվող «ՀՀ վարչատարածքային բաժանման մասին» օրենքում:

Հայաստանի ասորական համայնքի ներկայացուցիչը պնդեց, որ օրենսդրական փոփոխությունները միայն հայ ազգի համար են:

«Թույլ տվեք անմիջապես ձեր մի քանի որակումների հետ բոլորովին չհամաձայնել և խնդրել, որ հետայսու գոնե մեր քայլերի և գործողությունների մասին ձեր պատկերացումներն այդ որակումներով չարտահայտել»,- արձագանքեց Վաչէ Տերտերյանը և պնդեց, որ սխալ է պնդումը, թե ազգային փոքրամասնություններին մոռացել են և ռեֆորմները բացառապես հայ ազգին են վերաբերում:

Նա հավաստիացրեց, որ խոշորացումը դրական կանդրադառնա բոլոր գյուղերի վրա:

«Ինչ կապ ունի համայնքների խոշորացումն ասորական, եզդիական կամ հայկական գյուղերի հետ: Եթե խոսենք ավանդույթների մասին, այո՝ ունենք պրոբլեմ, լեզվի, ցուցանակների մասով նույնպես պրոբլեմ ունենք, մշակութային ժառանգության մասին 5 պրոբլեմ ասեք ասորական, 10-ը եզդիական համայնքների համար և ինքներդ էլ մի 100-ը կհիշեք նաև հայկական համայնքի վերաբերյալ»,-հայտարարեց Տերտերյանը և նկատեց, որ հարցում հնչեցրած դիսկրիմինացոն ֆոնն ազնիվ չէ նախագծի հեղինակների նկատմամբ:

Հիշեցնենք, որ սեպտեմբերի 8-ին կառավարության նիստում հավանության արժանացավ «Հայաստանի Հանրապետության վարչատարածքային բաժանման մասին» օրենքում փոփոխություններ և լրացումներ կատարելու մասին» և «Տեղական ինքնակառավարման մասին» օրենքում լրացումներ և փոփոխություն կատարելու մասին» ՀՀ օրենքների նախագծերի փաթեթը։

Ըստ այդմ նախատեսվում է իրականացնել համայնքների միավորման (վերակազմակերպման) 37 ծրագիր՝ Արագածոտնի մարզի Աշտարակ, Ապարան, Թալին, Մեծաձոր, Արևուտ, Արարատի մարզի Արարատ, Արտաշատ, Մասիս, Վեդի, Արմավիրի մարզի Արաքս, Արմավիր, Բաղրամյան, Խոյ, Մեծամոր, Վաղարշապատ, Փարաքար, Գեղարքունիքի մարզի Գավառ, Մարտունի, Սևան, Վարդենիս, Լոռու մարզի Թումանյան, Սպիտակ, Վանաձոր, Փամբակ, Կոտայքի մարզի Աբովյան, Գառնի, Ծաղկաձոր, Հրազդան, Նաիրի, Շիրակի մարզի Ախուրյան, Ամասիա, Աշոցք, Արթիկ, Վայոց ձորի մարզի Եղեգնաձոր, Ջերմուկ, Վայք, Տավուշի մարզի Նոյեմբերյան համայնքային փնջերում:

441 համայնք միավորվում է 37 համայնքային փնջով:

«Այսպիսով ՀՀ-ում այս գործընթացի ավարտից հետո կունենանք 77 համայնք և Երևանը: Ընդհանուր 78 համայնք կլինի, որից 8-ը՝ ազգային փոքրամասնություններով բնակեցված»,- ասել է Գնել Սանոսյանը։