Ձեր վստահելի աղբյուրը

«Ազատ կամք» նախաձեռնությունը, որը ստեղծել են փաստաբաններն ու բժշկները, հայց են նախապատրաստում՝ վարչական դատարանում վիճարկելու առողջապահության նախարարի հրամանը, որ հոկտեմբերի 1-ից աշխատողները կամ պետք է ներկայացնեն ՊՇՌ հետազոտության սերտեֆիկատ կամ պատվաստված լինեն: ԱԺ Մարդու իրավունքների պաշտպանության և հանրային հարցերի մշտական հանձնաժողովում քննարկումից հետո լրագրողներին ասաց Փաստաբանների պալատի նախագահ Արա Զոհրաբյանը:

Նա նաև նշեց, որ մասնագետների միջոցով հանրության շրջանում իրազեկման աշխատանքներ են տանելու, զբաղվելու են նաև մասնավոր իրավունքների պաշտպանությամբ՝ եթե գործատուի նկատմամբ տուգանք կիրառեն, գործատուին են պաշտպանելու, աշխատողի նկատմամբ տուգանք կիրառեն՝ աշխատողին են պաշտպանելու, եթե գործատուն աշխատողին նեղացնի, «Ազատ կամք» նախաձեռնության կարծիքով, հակասահմանադրական իրավական ակտի պատճառով, պաշտպանելու են աշխատողին գործատուից: Ա. Զոհրաբյանի խոսքով, դա անելու են անվճար:

«Մենք չենք պնդում, որ մարդիկ պատվաստվեն կամ չպատվաստվեն, ասում ենք՝ պատվաստվելը  պետք է լինի յուրաքանչյուր մարդու գիտակացված որոշումը»,- ասաց նա:

Ա. Զոհրաբյանի խոսքով, ԱԺ-ում այսօրվա քննարկման ժամանակ առողջապահության նախարարը շատ հարցերի չպատասխանեց, այդ թվում նաև բժիշկների հարցերին, որոնք կարևոր ու էական հարցեր էին:

«Հանրության մոտ կա վստահության պակաս այս պատվաստանյութերի վերաբերյալ, քանի որ տարբեր պետություններ չեն ընդունում մյուսների պատվաստանյութերը: Սա նշանակում է, որ մենք պետք է, բնականաբար, ևս մեկ անգամ զգուշանանք: Երկրորդ՝ իրենց ինչ-որ քաղաքականության կամ բիզնես շահերի հետևանք է: Այստեղ էլ հարց է ծագում՝ արդյոք մենք ինքներս էլ չենք համարվում այդ բիզնես շահերի սպասարկման օբյեկտ, քանի որ եթե պատվաստանյութը, ըստ մասնագետների,  պատշաճ կլինիկական փորձարկում չի անցել, ստացվում է՝ մենք  ինքներս փորձարկման օբյեկտ ենք,  իսկ այստեղ Սահմանադրությունն ուղիղ արգելում է բժշկական փորձեր կատարել մարդու վրա առանց իր համաձայնության»,- ասաց ՓՊ նախագահը:

Նա նշեց, որ պատվաստվելը կամ ՊՇՌ հետազոտությունը նույնպես բժշկական միջամտություններ են, երկուսից էլ քաղաքացին հրաժարվելու իրավունք ունի:

«Բայց եթե հրաժարվում է քաղաքացին երկուսից էլ, իրեն չեն թույլատրելու աշխատանքի: Այս մասով էլ կա լուրջ խնդիր, առավել ևս խտրական մոտեցում է, քանի որ պատվաստված մարդը նույնպես վարակակիր է, կարող է վարակվել ու վարակը փոխանցել»,- ասաց Արա Զոհրաբյանը:

Նա նշեց, որ Աշխատանքային օրենսգրքի 108-րդ հոդվածն ասում է՝ աշխատանքի չի թույլատրվում ալկոհոլ, թմրանյութ օգտագործած անձանց, ինչպես նաև օրենքով նախատեսված այլ դեպքերում, այսինքն՝ պետք է օրենքով դեպքերը նախատեսված լինեն, բայց որևէ օրենքով չի հանդիպել մի դեպք, որտեղ նշված լինի՝ եթե անձը չի կատարում առողջապահության նախարարի հրամանը, չպետք է թույլատրել աշխատել: Չկա նման դեպք:

Նրա ներկայացմամբ, գործատուն կարող է սանիտարական կանոնների չպահպանման, գրանցամատյանում գրառում չկատարելու համար տուգանվել: