Ձեր վստահելի աղբյուրը

Պայմանները, որոնցով միջազգային հանրությունը պատրաստ է ճանաչել Աֆղանստանի նոր կառավարությունը, հարմար չեն այն ձևավորած «Թալիբան» շարժման համար: ՏԱՍՍ-ի փոխանցմամբ, այդ մասին հինգշաբթի հայտարարել է տեղեկատվության և մշակույթի փոխնախարար Զաբիհուլլահ Մուջահիդը:

«Մեր կառավարության ճանաչման համար միջազգային հանրության կողմից առաջադրված պայմաններն անընդունելի են»,- նրա խոսքերը մեջբերել է «Sky News Arabia»-ն:

Ըստ «Թալիբան» շարժման ներկայացուցչի՝ այդ պայմանները խախտում են միջազգային իրավունքը:

Մուջահիդն ասել է, որ թալիբները ձգտում են այլ պետությունների հետ փոխադարձ հարգանքի վրա  հիմնված սերտ դիվանագիտական հարաբերություններ հաստատել: Նա հավելել է, որ իրենց արմատական շարժումը ՄԱԿ-ին կոչ է արել ընդհանուր լեզու գտնել դիվանագիտական փոխգործակցության համար:

Նրա խոսքով՝ նոր կառավարության ճանաչումն իրենց և Աֆղանստանի ողջ ժողովրդի իրավունքն է:

Թալիբների տեղեկատվության և մշակույթի փոխնախարարը նաև նշել է, որ Աֆղանստանի նոր կառավարության վերաբերյալ միջազգային հանրության արտահայտած բոլոր մտահոգությունները լուծելի են: