Ձեր վստահելի աղբյուրը

«ՀՀ սահմանամերձ բնակավայրերում շարունակվում է կյանքը լինել ոչ անվտանգ, ինչքան էլ փորձում ենք աչք փակել կամ այդ երևույթը դարձնել սովորական, չի հաջողվում»,- լրագրողների հետ զրույցում ասաց ԱԺ «Պատիվ ունեմ» խմբակցության անդամ, ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը:

Նա նշեց, որ մարդիկ իսկապես դժվարություններ ունեն իրենց ապագան այդ հատվածներում կառուցելու հարցում, ուղղակի մարդիկ անվտանգ միջավայր են ուզում:

Թ. Թովմասյանը հիշեցրեց, որ ադրբեջանցիները հափշտակել են Գեղարքունիքի մի քանի սամանամերձ բնակավայրերից անասուններ, նաև անիվներ այրել ու գլորել հակական կողմ, մի քանի  տասնյակ հեկտար խոտհարք է այրվել, այսինքն՝ մարդիկ տուժել են, սակայն որևէ փոխհատուցում չեն ստացել, չնայած բարձրաձայնել է այդ խնդիրը:

Ընդդիմադիր պատգամավորի խոսքով, չի հասկանում, թե որ իրավակարգավորմամբ,  ինչ միջազգային պայմանավորվածությամբ, գուցե բանավոր ինչ պայմանավորվածության հիման վրա է ադրբեջանական զինուժը, ըստ էության, վերահսկողություն սահմանել Գորիս-Կապան ավտոճանապարհի վրա:

«Որևէ փաստաթղթում մենք չենք տեսնում դա: Նույնիսկ այն քարտեզները, որոնք անընդհատ իշխանական տարբեր գործիչներ վկայակոչում են, որ հենց դրանց հիման վրա է ադրբեջանական զինուժը ներխուժել և դա իրենց տարածքն է, չեմ կարողանում հասկանալ, թե ինչու է այդ  մի քարտեզը վերցվում, իսկ այն քարտեզները, որոնք մի քիչ մեր օգտին են, որոնց մեջ նշված են, որ մերն են եղել, մեր վերահսկողության տակ են եղել այդ տարածքները, դրանք չեն դրվում կիրառության մեջ: Չեմ հասկանում, թե ինչ սկզբունքով են ընտրվում այդ քարտեզները որպես գործածության մեխանիզմ»,- ասաց Թ. Թովմասյանը:

Նա նշեց՝ չի հասկանում, թե ինչու է ՀՀ իշխանությունը շարունակում սպասարկել ադրբեջանական շահն ու անընդհատ ադրբեջանական գործողություններն արդարացնել:

«Երբ Գորիս-Կապան ավտոճանապարհի փակման միջադեպը տեղի ունեցավ, որպես ԱԺ մարդու իրավունքների հանձնաժողովի նախագահ, արագորեն նամակներ եմ ուղարկել մարդու իրավունքների պաշտպանությամբ զբաղվող մի շարք կառույցների՝ ՄԱԿ, Եվրախորհուրդ, Եվրախորհրդարան: Այսինքն՝ ես բարձրաձայնում եմ, աղմկում եմ, աջակցություն եմ խնդրում աշխարհից, որ մարդիկ ներխուժել են մեր սուվերեն տարածք, այդ օրերին երեք համայնք շրջափակման մեջ էին գտվում, Փաշինյանը կամ իշխանության որևէ ներկայացուցիչ ամբիոնից հայտարարում են, որ դա իրենց տարածքն է:

Հետևաբար իմ՝ որպես Մարդու իրավունքների պաշտպանության և հանրային հարցերի մշտական հանձնաժողովի նախագահի դիմումները դառնում  են առոչինչ, անիմաստ, անհիմն թղթի կտոր, երբ ես չեմ կարողանում իմ իրավունքները որպես երկրի ներկայացուցիչ պաշտպանել միջազգային հարթակներում»,- նշեց «Պատիվ ունեմ» խմբակցության  պատգամավորը:

Նրա խոսքով, կառավարության նման քայլերը նույնիսկ երկար տարիներ անց հնարավոր չի լինելու շտկել, ճակատագրական սխալ է:

«Իրենք վկայակոչում են մի քարտեզ, ինչո՞ւ մենք հակառակ քարտեզը չենք վկայակոչում: Նոյեմբերի 9-ի տեքստում որևէ բան չկա Սյունիքի սահմանների մասին: Ստացվում է, որ կորցրեցինք ոչ միայն Արցախի մեծ մասը, նաև Սյունիքից որոշ հատվածներ են կորսված»,- նշեց ընդդիմադիր պատգամավորը:

Թագուհի Թովմասյանն անհեթեթ որակեց ԱԱԾ այն հայտարարությունը, թե Գորիս-Կապան ճանապարհին քաղաքացիները մոլորվել էին ու անցել ադրբեջանական հսկողության տակ անցած տարածք:

«Չհասկացա, թե դրա իմաստը որն էր, քանի որ այնտեղ անհնար է մոլորվել, ուղիղ ճանապարհ է: Նշանակում է քեզ պետք է կանգնեցնեն ու առևանգեն, մոլորվելու տարբերակ չկա: Հետևաբար  ծաղրել մի ողջ հանրության ու ասել մոլորվել են, կարծում եմ, ամենալավ լուծումը չէ: Որպես ԱԱԾ՝ նրանք պարտավոր են մեր անվտանգությունն ապահովել, ոչ թե ադրբեջանական զինված ուժերի գործողություններն արդարացնեն»,- ասաց նա: