Ձեր վստահելի աղբյուրը

«Շատ կարևոր քննարկում և նախագծեր ունենք այսօր»,- ԱԺ արտահերթ նիստում ասաց ՀՀ տարածքային կառավարման և ենթակառուցվածքների նախարար Գնել Սանոսյանը։ Նա Աժ օրակարգում ընդգրկված «Հայաստանի Հանրապետության վարչատարածքային բաժանման մասին» օրենքում փոփոխություններ և լրացումներ կատարելու մասին և «Տեղական ինքնակառավարման մասին» օրենքում լրացումներ և փոփոխություն կատարելու մասին օրենքների նախագծերի փաթեթի հիմնական զեկուցողն է։

Նրա խոսքով, ակնհայտ է, որ գոյություն ունեցող վարչատարածքային բաժանումները հաճախ լրջագույն խոչընդոտներ են ստեղծում համայնքների զարգացման համար, այդ խոչընդոտներն առավել ակնառու են 3000-ից ավելի փոքր բնակչություն ունեցող համայնքների պարագայում։

«Ուսումնասիրությունները ցույց են տալիս, երբ համայնքի բնակչությունը 3000-ից քիչ է, մի շարք ծառայություններ կան, որոնք համայնքապետերն հաճախ ի զորու չեն լինում իրականացնել, էլ չենք խոսում կապիտալ մեծ ծրագրերի, համայնքում ենթակառուցվածքների զարգացման և այլ խնդիրների մասին»,- ասաց Գ. Սանոսյանը։

Նա նշեց, որ Հայաստանում 866-ը գյուղական համայնք է, մեծ մասի բնակչության թիվը նշվածից քիչ է և նման խնդիրներ են առաջանում, և այդ խնդիրների համատեքստում էլ 2011 թվականից Հայաստանում սկսվել է քննարկել համայքների միավորման, խոշորացման, միջհամայքնային միություններ ստեղծելու գաղափարը։

Հ. Սանոսյանի խոսքով, բուն պրոցեսը տեղի է ունեցել 2016-17 թթ, Հայաստանի 486 համայնք  միավորվել են 56 համայնքային փնջերի կամ միավորումների մեջ։

«Հաշվի առնելով եղած փորձը, դրական և բացասական կողմերը, վերլուծելով անցած ճանապարհը, փորձել ենք շարունակել համայքների խոշորացման գործընթացը որոշակի փոփոխություններ առաջ բերելով՝ շատ ավելի խոշոր միավորներ ստեղծելով։

Նախագծով Հայաստանի 441 համայնք առաջարկվում է միավորել 37 համայնքային փնջերի կամ միավորումների մեջ»,- ասաց նախարարը։

Նա նշեց, որ բնակիչների, համայնքապետերի, շահագրգիռ անձանց մեծ մասը կողմնակից են եղել շրջանային մոդելին։

«Իհարկե, մենք ամբողջովին շրջանային մոդելը չենք վերականգնել։ Կարծում ենք՝ այդպես նույնիսկ ճիշտ էլ չէ, բայց մի շարք տեղերում, հաշվի առնելով աշխարհագրական դիրքը, ենթակառուցվածքները, համայնքների խտությունը, բնակչության քանակը և այլ գործոններ, մի շարք տեղերում վերականգնել ենք նաև շրջանները, որոնց հաճախ անվանում ենք  նախկին սովետական շրջաններ»,- ասաց Գ. Սանոսյանը։

Նա ընդգծեց, որ խոշորացման նպատակը կառավարման արդյունավետության բարձրացումն է։

«Մենք ոչինչ չենք փակում, կառավարման մոդելն ենք փոխում՝ նպատակ ունենալով կառավարման  արդյունավետությունը բարձրացնել և եղած կարողությունները, հմտությունները միատեղել, դրանով մի կողմից նպաստելով համայնքների զարգացմանը, մյուս կողմից ունենալ այդքան քննարկված ապակենտրոնացումը»,- ասաց նա։

Գ. Սանոսյանը տեղեկացրեց, որ և շրջանային, և փնջային մոդելն են ընտրել՝ ելնելով տեղի դիրքից, բնակչության քանակից և այլ առանձնահատկություններից, այդ իսկ պատճառով նախկին 37 սովետական շրջանների փոխարեն առաջարկում են ունենալ 77 համայնք և Երևան։

«Հաճախ հարցնում են՝ քաղաքական պրոցես է, թե ոչ։ Իհարկե, քաղաքական պրոցես է, ընտրություններ են, այն էլ համամասնական, քաղաքական ուժերն են մասնակցում։ Կարծում եմ՝ սա շատ լավ է, քաղաքական ուժերը ոչ միայն կմասնակցեն, այլ սրանից հետո Հայաստանի բոլոր բնակավայրերում տեղի ունեցող պրոցեսների զարգացման գործընթացների համար հենց քաղաքական ուժերը պատասխանատվություն կկրեն, քանի որ իրենց թիմի ներկայացուցիչները լինելու են կամ ավագանու անդամ, կամ համայանքապետ, կամ վարչական ղեկավար»,- ասաց Սանոսյանը։

Նա նշեց, որ մարզպետարանները չեն փակվում, նաև համայնքապետարաններն են գործելու. «Բոլոր համայքներում կլինեն համայնքապետարաններ, կլինի վարչական ղեկավար և օպերատոր, խոշոր համայնքներում՝ երկուսից ավելի աշխատողներ»։