Ձեր վստահելի աղբյուրը

«Այս փոփոխություններով պարզեցնում ու թվայնացնում ենք եկամտային հարկի վերադարձման գործընթացը»,- կառավարության նիստում հայտնեց Պետական եկամուտների կոմիտեի նախագահ Ռուստամ Բադասյանը՝ ներկայացնելով հերթական նախագիծը։

Մասնավորապես, ՊԵԿ նախագահը զեկուցեց ՀՀ կառավարության 2015 թվականի փետրվարի 19-ի N 205-Ն և 2017 թվականի հոկտեմբերի 5-ի N 1321-Ն որոշումներում փոփոխություններ և լրացումներ կատարելու մասին նախագիծը, որով նախատեսվում է թվայնացնել հիփոթեքով բնակարաններ գնած քաղաքացիների եկամտահարկի վերադարձի գործընթացը:

Նրա խոսքով՝ երբ քաղաքացին առաջին անգամ դիմում է եկամտահարկի վերադարձի համար՝ ներկայացնում է վարկային պայմանագիրը, բանկի փաստաթղթերը, կառուցապատողի տեղեկանքը և այլ փաստաթղթեր, այնուհետև ամեն եռամսյակ ներկայացնում է եկամտահարկի վերադարձի դիմում:

«Մենք փոխում ենք համակարգը, առաջին անգամ դիմելու դեպքում նույն փաստաթղթերն են ներկայացվելու, մեկ տարբերությամբ՝ 15 օրվա ընթացքում դիմողին տրամադրվելու է լոգին, գաղտնաբառ, որի միջոցով նա անձնական գրասենյակ է ունենալու և ամեն եռամսյակի արդյունքներով այդ անձական գրասենյակում ինքնաշխատ եղանակով երկու տվյալ է գեներացվելու, և դիմում է գեներացվելու, որն էլեկտրոնային եղանակով ներկայացվելու է հարկային մարմին և գործող աշխատանքային 15 օրվա փոխարեն՝ երեք աշխատանքային օրվա ընթացքում վճարված եկամտային հարկը վերադարձվելու է համապատասխան բանկային հաշվին»,- ասաց Բադասյանը։

Նա նաև հայտնեց, որ նախագծով նախատեսվում են նաև հիփոթեքային վարկի սպասարկման համար վճարված տոկոսների մասին տեղեկանքը բացառապես ԱՔՌԱ վարկային բյուրոյի միջոցով էլեկտրոնային եղանակով հարկային մարմին ներկայացնելու կարգավորումներ։