Ձեր վստահելի աղբյուրը

«Համայնքների խոշորացումը պետք է ունենա տրամաբանություն՝ հիմնված միջազգային փորձի վրա, այն չպետք է լինի ձևական»,- ԱԺ-ում լրագրողների հարցերին ի պատասխան հայտարարեց ԱԺ «Հայաստան» խմբակցության պատգամավոր Արամ Վարդևանյանը։

Նրա համոզմամբ, այսօր իրականացվող խոշորացման գործընթացը մեկ նպատակ ունի։

«Իշխանությունը նկատել է, որ կան համայնքներր, որոնք իրենք չեն ենթարկվում, իրենց ցուցումները, հրամանները չեն կատարում, վարչական ռեսուրսի պրոցեսի մեջ չեն ներգրավվում, դրա համար որոշել են խոշորոցնել, փոխել այդ համայնքի ղեկավարներին»,- ասաց նա։

Պատգամավորը աննախադեպ որակեց այն երևույթը, երբ այդ համայնքների ղեկավարների փոխարեն նշանակվում են պաշտոնակատարներ, որոնք պետք է նախապատրաստեն ընտրությունները։

«Ամեն ինչ պարզ է, թե ինչ է կատարվում։ Իրականում 2021 թ. մայիսից ի վեր խոշորացման գործընթացը կտրուկ փոփոխության ենթարկվեց ՍԴ որոշման պատճառով։ Դատարանը հստակ ամրագրեց, որ խոշորացումը պետք է իրականացվի՝ ապահովելով երկու պայման։ Նախ, փոքր համայնքներն ունեն լսելի լինելու իրավունք, իսկ երկրորդը տեղական հանրաքվեն է։ Դուք լսե՞լ եք, որ տեղական հանրաքվե անցկացված լինի։ Այսինքն, ՍԴ որոշումը ցինիկաբար խախտվում է»,- ասաց Վարդևանյանը։

Մասնագիտությամբ իրավաբան պատգամավորն ընդգծեց, ՍԴ որոշումը չկատարելը ոչ թե ապօրինություն է, այլ հանցանք։

«Այսօր Աժ նիստերի դահլիճում սղագրությամբ արձանագրվեց, որ այս պրոցեսն իրենից ներկայացնում է հանցանք։ Հարցը բարոյական հարթության մեջ չէ, ՍԴ-ն երկու ելակետ է դրել, չեն կատարել, պետք է կրեն պատասխանատվություն»,- նշեց Վարդևանյանը։

Ընդդիմադիր պատգամավորն ասաց, միակ մարդը որ կարող է կանխել այս գործընթացը, ՀՀ նախագահն է։

«Ես կրկնում եմ, փոքր համայքններում պետք է անցկացվեն լսումներ, մի քիչ մեծ համայնքներում պետք է իրականացվի տեղական հանրաքվե, որը պետք է իրականացվի կառավարության բյուջետային միջոցների հաշվին։ Շատ կարևորում ենք, որ Հանրապետության նախագահը չստորագրի այս խայտառակ ապօրինի պրոցեսին վերաբերող օրենքը, որը վստահ եմ ընդունվելու է»,-նշեց նա։

Վարդևանյանի խոսքով, այդ օրենքի քննարկումներին ու քվեարկությանը չմասակցելով՝ ընդդիմադիրներն օգնում են համայնքներին ու դրանց բնակիչներին։