Ձեր վստահելի աղբյուրը

«Մեր մեջքի հետևում պատրաստվում են այն պայմանավորվածություններին, որոնք, կարծում եմ, մոտ ապագայում կլինեն՝ տարածքներ, միջանցք։ Այդ պրոցեսներին են պատրաստվում»,-ԱԺ-ում լրագրողների հետ ճեպազրույցում ասաց «Հայաստան» խմբակցության պատգամավոր Վահե Հակոբյանը։

Նա նշեց, որ այս պահին Սյունիքում 1000-ից ավելի ադրբեջանցի կա, ակտիվ ինժեներական աշխատանքներ են իրականացնում, ենթադրվում է՝ պատրաստվում են ձմեռվան։

«Ներկա իշխանությունն անում է ամեն ինչ՝ նպաստելու հայկական գյուղերի դատարկմանը: Սյունիքի մարզից նկատվում է ամենամեծ արտագաղթը՝ մարդիկ անելանելիությունից և անտարբերությունից ելնելով լքում են իրենց բնակավայրերը։

110 հազար Հայաստանի քաղաքացի լքել է երկիրը միայն 2021-ին»,- ասաց Վ.Հակոբյանը։

Նա հույս հայտնեց, որ անազատության մեջ գտնվող Գորիսի գործող քաղաքապետ Առուշ Առուշանյանը կվերընտրվի իր պաշտոնում:

«Քանի որ նա այժմ անազատության մեջ է, այդ քարոզչությունը կիրականացնեն նրա հայրը, նրա համախոհները, մենք բոլորս: Տեղական ինքնակառավարման մարմինների ընտրություններին «Առուշ Առուշանյան» դաշինքից ցուցակում կլինեն նաև նրա տեղակալ Մենուա Հովսեփյանը և Իրինա Յոլյանը։ Իրինա Յոլյանը լինելու է ցուցակի երրորդ համարը»,-ասաց Վ.Հակոբյանը:

Ինչ վերաբերում է այսօր ԱԺ-ում քննարկված համայնքների խոշորացման վերաբերյալ նախագծին, Վահե Հակոբյանն ասաց, որ դա արվում է միայն մեկ նպատակով՝ ՏԻՄ ընտրություններ, ամենուր իրենց ներկայաուցիչներին նշանակելու կամ ընտրելու համար, համայնքի բնակիչների կարծիքը հաշվի չի առնվել։

«Էս ապաշնորհ և դաժաճան իշխանություններից ամեն ինչ սպասում եմ՝ միգուցե փնջերով հանձնեն»,- ասաց ընդդիմադիր պատգամավորը։

Վահե Հակոբյանն ասաց, որ իրենք  ամեն հնարավոր միջոց՝ խորհրդարան, փողոց, օգտագործելու են ապաշնորհ իշխանությանը երկրից վերջապես վռնդելու համար։