Ձեր վստահելի աղբյուրը

«Սպասելի էր դատարանի որոշումը դատաբժշկական փորձաքննություն նշանակելու մասին, նախադրյալներ կային փորձաքննություն նշանակելու և հասկանալու, թե արդյոք առկա են կառավարության որոշմամբ սահմանված այն հիմքերը, որոնք անհամատեղելի են կալանավորման հետ կապված հիվանդությամբ»,- ԱԺ «Հայաստան» խմբակցության պատգամավոր, պրոֆեսոր Արմեն Չարչյանի գործով դատարանի որոշումից հետո լրագրողների հետ զրույցում ասաց Չարչյանի պաշտպան Էրիկ Ալեքսանյանը։

Միաժամանակ նա ընդգծեց, որ անհասկանալի էր դատարանի որոշումը խափանման միջոցի հետ կապված։

Հիշեցնենք, որ այսօր հրատապ հրավիրված դատական նիստին պաշտանական կողմը միջնորդություն  ներկայացնեց ընտրված խափանման միջոց կալանքը փոփոխել, կիրառել գրավ, իսկ մեղադրողը միջնորդեց նշանակել դատաբժշկական փորձաքննություն։ Դատարանը  որոշեց դատաբժշկական հանձնաժողովային փորձաքննություն նշանակելու մասին մեղադրողի միջնորդությունը բավարարել, իսկ պաշտպանների  միջնորդության քննարկումը հետաձգել մինչև գործով էական հանգամանքների պարզումը, այն է՝ փորձաքննության եզրակացության ստանալը։

«Խափանման միջոցի վերաբերյալ որոշումը հետաձգելու առումով, անկեղծ ասած, գործնականում առաջին անգամ եմ տեսնում նման որոշում։ Խափանման միջոցի վերաբերյալ որոշումը պետք է կայացվի անհապաղ, դրան տրվի լուծում՝ կամ փոխվում է խափանման միջոցը կամ չի փոխվում։ Հետաձգել մինչև էական հանգամանքերի պարզումը, առաջին անգամ եմ նման բան տեսնում։ Այդ իսկ պատճառով դատարանի այս որոշումը իրավական առումով դեռ չեմ հասկանում, թե ինչպես է դատարանն այն դատական ակտով պատճառաբանելու»,- ասաց Է. Ալեքսանյանը։

Նա նշեց, որ գրեթե կասկած չունի՝ այդ որոշումը կբողոքարկեն։

Պաշտպանի խոսքով, փորձաքննության նշանակելը բավականին ժամանակատար է, միգուցե երկու ամիս պահանջվի մինչև եզրակացություն տրվի։

«Որևէ մեկը կարո՞ղ է ասել՝ այդ ընթացքում Արմեն Չարչյանի առողջական վիճակն ավելի կվատթարանա, թե ոչ։  Ես վստահ  եմ, որ կվատթարանա։ Թող այդ ժամանակ պետությունը մտածի հետագա հետևանքների մասին։ Այսինքն անձը պարտադիր պետք է ընկնի կոմայի մեջ, վիճակն էլ ավել վատթարանա, որ պետությունը նոր հասկանա՝ լուրջ խնդրի հետ գործ ունեն։

Այսօրվա իմ ամբողջ ասածն այն է, որ թույլ չտանք ուշացված արդարադատություն։ Է՞ս է իրենց մարդասիրության սկզբունքը, է՞ս է իրենց համար Սահմանադրությամբ սահմանված առողջության իրավունքի բարձր արժեքը, որի մասին սիրուն խոսում են»,- ասաց Է. Ալեքսանյանը։

Նա ընդգծեց՝ այս գործով ի սկզբանե տեսել են քաղաքական ենթատեքստ, մինչ օրս էլ տեսնում են։
«Եթե սա չէ քաղաքական հետապնդումը, բա էլ ո՞րն է»,- նշեց պաշտպանը։

Դատարանի բակում լրագրողների հետ զրույցում «Հայաստան» խմբակցության պատգամավոր Արթուր Ղազինյանը դատարանի որոշման երկրորդ մասը՝ խափանման միջոցի հետ կապված, գնահատեց քաղաքական պատվեր՝ մերժել, թույլ չտալ փոխել կալանքը՝ հղում անելով փորձագիտական կառույցի եզրակացության  բացակայության վրա, մինչդեռ միայն այն ողջամիտ կասկածը, որ կարող է կալանքն անհամատեղելի լիներ  պարոն Չարչյանի մոտ առողջական վիճակին, դատարանը պարտավոր էր անմիջապես բավարարել միջնորդությունը և փոխել գրավով։

«Մարդու առողջությունը, կայնքը բացարձակ արժեք է, չեն դնում քննարկում, որ չունենք հավաստի փաստեր։ Կասկած ունես, բավարարի այդքանը, չպետք է սպասել երկու ամիս մինչև փորձագետներն ուսումնասիրեն ու հետո ասեն՝ գտնում ենք անհամատեղելի է։ Իսկ եթե պարզվեց, որ իրականում անհամատեղել է՝ ո՞վ է կրելու պատասխանատվություն անհամատեղելի առողջական խնդիր ունեցող մարդուն 1, 2  3 ամիս կալանքի տակ պահելու համար։

Եթե վերջում ապացուցվեց, որ պարոն Չարչյանի առողջական վիճակն անհամատեղելի է  կալանքի հետ, անխուսափելիորեն դատավորը պետք է ենթարկվի կարգապահական պատասխանատվության։
Եթե Արմեն Չարչյանի առողջությանը վնաս եղավ, պատասխանատվությունը կրելու է դատավորը, ով այսպիսի որոշում է կայացրել»,- ասաց Ա. Ղազինյանը։

Նա նշեց, որ նոր Հայաստանի դատական համակարգի գործողության ոճն է՝ դատարանը դարձել է  կառավարության, իշխող քաղաքական ուժի, առավելապես մեկ անձի գրպանային համակարգ, որտեղ իրենք ժանգլորություն անելով կարողանում են իրենց ուզած վճիռներն ու որոշումները պարտադրել դատարաններին, ստանալ իրենց քաղաքական քիմքին հարմար որոշումներ։

«Սա իրականում կապ չունի իրավունքի գերակայության, ժողովրդավարության, մարդու իրավունքների հետ, տրամագծորեն հակառակն է»,- ասաց Արթուր Ղազինյանը։