Ձեր վստահելի աղբյուրը

Երևանի ընդհանուր իրավասության դատարանը, դատավոր Վահե Միսակյանի նախագահությամբ, հրապարակվեց «Հայաստան» խմբակցության անդամ, հայտնի բժիշկ Արմեն Չարչյանին գրավի դիմաց ազատ արձակելու մասին միջնորդության որոշումը:

Դատավորը հայտարարեց, որ բավարարվել է դատաբժշկական հանձնաժողովային փորձաքննություն նշանակելու մասին մեղադրողի միջնորդությունը։ 

«Արմեն Չարչյանի նկատմամբ նշանակել դատաբժշկական հանձնաժողովային փորձաքննություն», - հայտարարեց դատավոր Վահե Միսակյանը։

Ինչ վերաբերում է պաշտպանների միջնորդությանը՝ նոր ի հայտ եկած հանգամանքների շրջանակներում ընտրված խափանման միջոց կալանքը փոփոխել, կիրառել գրավ, դատավորը հայտարարեց, որ դատարանը որոշել է միջնորդության քննարկումը հետաձգել մինչև գործով էական հանգամանքների պարզումը, այն է՝ փորձաքննության եզրակացության ստանալը։

«Դատարանի նման դիրքորոշումը պայմանավորված է այն հանգամանքով, որ դատարանը, հետազոտելով և ուսումնասիրելով միջնորդության հիմնավորումները, եկել է այն եզրահանգման, որ նշված միջնորդության վերաբերյալ օրինական և հիմնավորված դատական ակտ կայացնելու համար էական նշանակություն ունի Չարչյանի առողջական վիճակի վերաբերյալ մասնագիտական կարծիք ստանալը, որի պայմաններում նոր հնարավոր կլինի միջնորդությունը լուծել: Հետևաբար փորձաքննության եզրակացությունը ստանալուց հետո նոր կքննարկվի գրավը որպես խափանման միջոց ընտրելու մասին միջնորդությունը»,-ասաց Վահե Միսակյանը:

Հիշեցնենք, որ այսօր հրատապ հրավիրված դատական նիստին պաշտանական կողմը միջնորդություն  ներկայացնեց ընտրված խափանման միջոց կալանքը փոփոխել, կիրառել գրավ, իսկ մեղադրողը միջնորդեց նշանակել դատաբժշկաական փորձաքննություն։

Հաջորդ դատական նիստը նշանակվեց հոկտեմբերի 13-ին։

Հիշեցնենք, որ Էրիկ Ալեքսանյանը սեպտեմբերի 1-ին Արմեն Չարչյանի խափանման միջոցի փոփոխման հարցի քննարկման համար հրատապ նիստ հրավիրելու մասին միջնորդություն էր ներկայացվել դատարան։ Նիստը հրավիրվել էր այսօր։

Պրոֆեսոր Արմեն Չարչյանի առողջական վիճակը սրվել  էր, սրտամկանի կաթված էր տարել, մեկուսարանից տեղափոխվել էր քաղաքացիական հիվանդանոց։ Նրա մոտ ախտորոշվել էր նաև թոքաբորբ: Այսօրվա դրությամբ, ըստ պաշտպանի, պրոֆեսորի առողջական վիճակը գնահատվում է կայուն ծանր։

«Հայաստան» խմբակցության պատգամավոր Արմեն Չարչյանը կալանավորվել է օգոստոսի 23-ին: Վերաքննիչ քրեական դատարանը, դատավոր Ռուբիկ Մխիթարյանի նախագահությամբ, բավարարել էր Չարչյանին գրավի դիմաց ազատ արձակելու մասին որոշման դեմ դատախազության բողոքը՝ բեկանելով առաջին ատյանի դատարանի որոշումը և անփոփոխ թողել մինչդատական վարույթում Չարչյանի նկատմամբ ընտրված խափանման միջոց կալանավորումը։

Ա.Չարչյանին մեղադրանք է առաջադրվել՝ ՀՀ ՔՕ 154.2-րդ հոդվածի 4-րդ մասի 2-դ կետի հատկանիշներով (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը):