Ձեր վստահելի աղբյուրը

Մեղրի քաղաքում՝ Փարամազի արձանի հարևանությամբ բացվել է հուշակոթող՝ ի հիշատակ 44-օրյա պատերազմում իրենց կյանքը հանուն հայրենիքի պաշտպանության զոհաբերած մեղրեցի քաջորդիների:Այս մասին տեղեկացնում են համայնքապետարանից։

«Միջոցառումը համախմբել էր բազմաթիվ մարդկանց, մասնակցում էին Մեղրի համայնքի ղեկավար Ա. Թումանյանը, տեղակալ Ա. Մաթևոսյանը, համայնքապետարանի մի շարք աշխատակիցները  և քաղաքացիներ, ովքեր եկել էին խոնարհվելու և հարգանքի տուրք մատուցելու հերոս տղաների հիշատակին:

Նախաձեռնության հեղինակները Մեղրի համայնքի գործարարներ Անդրանիկ Մովսիսյանը  և Բախշի Բախշյանն են:

Միջոցառումը մեկնարկեց տարածաշրջանի քահանա Տեր Ռաֆայելի հոգեհանգստյան կարգով և առ Աստված բարձրացված աղոթքով:

Հուշակոթողի հանդիսավոր բացման արարողությունից հետո կատարվեց խնկարկման և ծաղկադրման արարողակարգ:

Միջոցառմանը ելույթով հանդես եկավ Մեղրի համայնքի ղեկավար Ա. Թումանյանը, պաշտոնատար այլ անձինք և Մեղրի համայնքի բնակիչներ:

Միջոցառումն ուղեկցվեց Մեղրիի Մարզամշակութային կենտրոնի սաների կատարումներով:
Այժմ Մեղրի համայնքն ունի ևս մեկ վայր, որտեղ կարող ենք խոնարհվել հավերժի ճամփորդ դարձած մեր քաջորդիների հիշատակի առջև, որոնք չմահացան, այլ անմահացան և մեզ հանար ապրելու իրավունք նվաճեցին, իսկ նրանց անունները սրբագործվեցին՝ որպես արժանապատիվ ապրելու և հայրենիքը պաշտպանելու պատգամ»,- ասվում է հաղորդագրությունում։