Ձեր վստահելի աղբյուրը

Ռուսական խաղաղապահ զորախմբի զինծառայողներն Արցախի շփման գծի մոտակայքում գտնվող 27 հա տարածքով 5 այգիներում ապահովել են ավելի քան 500 տոննա խաղողի բերքահավաքի աշխատանքների անվտանգություը: Այդ մասին լուրը հաղորդում է ՌԴ ՊՆ-ն:

Ըստ հաղորդագրության՝ արդեն մեկ ամիս ռուս խաղաղապահների ներկայությամբ բերքահավաք է Մարտունու շրջանի Ճարտար, Մաճկալաշեն, Ամարաս բնակավայրերի և Ասկերանի շրջանի Խրամորթ գյուղի խաղողի այգիներում:

«Մեր խնդիրն է խաղողի բերքահավաքի ժամանակ ապահովել Մարտունու շրջանի Մաճկալաշեն գյուղի հողագործների անվտանգությունը: Մաճկալաշենի վարչական ղեկավարը խնդրել է ռուս խաղաղապահ զորախմբին ապահովել սահմանազատման գծի մոտակայքում բերքահավաքի աշխատանքների անվտանգությունը: Տեղի բնակիչները իրենց պաշտպանված են զգում ռուս խաղաղապահների ներկայությամբ»,- ասել է խաղաղապահ զորախմբի ներկայացուցիչ Անդրեյ Ռեզնիկովը:

ՌԴ ՊՆ-ն հայտնում է, որ մի քանի օր առաջ Արցախի գինեգործներն իրենց առաջին բերքի մի մասը նվիրաբերել էին Ստեփանակերտի գիշերօթիկ դպրոցի երեխաներին: Այս դեպքում էլ խաղողի բերքահավաքի ժամանակ խաղաղապահներն ապահովել էին այգիների աշխատողների անվտանգությունը:

«Այսօր մենք սկսեցինք բերքահավաքը և այն հասցրեցինք մեր երեխաներին: Խաղաղապահները բերքահավաքի ժամանակ ապահովեցին մեր անվտանգությունը: Որոշեցինք առաջին բերքը կիսել մեր մանկատան հետ »,- ասել է գինու գործարանի ներկայացուցիչ Աննա Սարգսյանը:

Հաղորդագրության մեջ ասվում է, որ այս տարվա գարնանը ռուս սակրավորները մաքրել էին այդ տարածքները պայթուցիկ նյութերից՝ ապահովելով խաղողի այգիների անվտանգ խնամքը, ինչպես նաև ժամանակին բերքահավաքը:

Ըստ ՌԴ ՊՆ-ի՝ 2020 թվականի նոյեմբերի 23-ից չպայթած զինամթերքից մաքրվել է 2,298 հա տարածք, 683 կմ ճանապարհ, 1,937 շենք, հայտնաբերվել և վնասազերծվել է 26,032 պայթուցիկ առարկա: