Ձեր վստահելի աղբյուրը

ԱԺ պաշտպանության և անվտանգության հարցերի հանձնաժողովը երկու ամսվա ընթացքում անգործության է մատնվել, որևէ նախաձեռնությամբ հանձնաժողովում հարց չի քննարկվում։ Հանձնաժողովի արտահերթ նիստում հայտարարեց հանձնաժողովի անդամ, ԱԺ «Հայաստան» խմբակցության անդամ Գեղամ Մանուկյանը։

Նա նշեց, որ արդեն 2 ամիս ձևավորվել է նոր Ազգային ժողովը, երկու ամիս գործունեության է ծավալում, այդ թվում նաև պաշտպանության և անվտանգության հարցերի հանձնաժողովը։

«Հանձնաժողովը, այս ռազմաքաղաքական իրավիճակում, շատ լարված սահմանային իրավիճակում, երբ թշնամին օկուպացրել է նաև Հայաստանի սուվերեն տարածքը, չեն դադարում թշնամու կողմից սադրանքները, սահմանի գերթե ողջ երկայնքով դեռ անմխիթար կահավորված վիճակում են առաջնագծի հենակետերը, այս երկու ամսվա ընթացքում միակ հարցը, որը քննարկում է ու եզրակացության չի հանգում,  պաշտպանության հանձնաժողովի նախագահի տեղակալի ընտրությունն է։ Երկու ամսում հանձնաժողովում օրակարգ չի բերվել պաշտպանական, անվտանգային բնույթի որևէ նախագիծ, որևէ օրենսդրական նախաձեռնություն,  հանձնաժողով բերված որոշ նախաձեռնություններն էլ քննարկման նյութ չեն դառնում»,- ասաց Գեղամ Մանուկյանը։

Նա նշեց, որ այսօր օրակարգում կրկին փոխնախագահի հարցն է ու մի անհասկանալի ձևակերպումով հարց՝ հանձնաժողովի նախագահի բացակայության ժամանակ քվեարկությամբ ով պետք է վարի նիստը։

«Աննշան, քիչ էական հարց, որը կարող է այսօր  հանձնաժողովի անդամներից առնվանզ «Հայաստան» և «Պատիվ ունեմ» խմբակցությունների ներկայացուցիչների հետաքրքրի»,- ասաց ընդդիմադիր պատգամավորը։

Հիշեցնենք, որ արդեն չորս անգամ հանձնաժողովի ՔՊ-ական  անդամները «Հայաստան» խմբակցության անդամ Արթուր Ղազինյանին չեն ընտրում ԱԺ մշտական հանձնաժողովի նախագահի տեղակալի պաշտոնում։