Ձեր վստահելի աղբյուրը

Ընդհանուր իրավասության դատարանում քննվող գործի շրջանակում «Հայաստան» խմբակցության պատգամավոր Արմեն Գևորգյանը ցանկանում էր հայտարարություն անել դատարանի՝ իրեն երկիրը լքել թույլ չտալու որոշման վերաբերյալ, սակայն նախագահող դատավոր Աննա Դանիբեկյանը թույլ չտվեց։ Գևորգյանն առարկեց դատավորի գործողություններին։ Դատավորն ասաց՝ արձնագրված է առարկությունը։

Սա բարկացրեց այս նիստում որպես պաշտպան ներգրավված Լուսինե Սահակյանին, նա դատավորին խնդրեց հրապարակել Գևորգյանի ներկայացրած առարկության բովանդակությունը։ Նա խոստովանեց՝ հետևել է այս գործով դատական նիստերին։

«Սակայն մենք նպատակ ունենք փորձել ապահովել դատավարության նորմալ ընթացք։ Շատ մեծ հույս ունենք, որ դատարանն էլ կփորձի նորմալ ընթացքը ապահովել։ Իմ պաշտպանյալն իրավունք ունի և´ հայտարարություն անել, և´ առարկություն հայտնել։ Այս իրավունքն իմ պաշտպանյալից ոչ ոք չի խլել, դատարանն էլ այն խլելու իրավունք չունի»,-ասաց փաստաբանը։

Հիշեցնենք, որ  դատավոր Աննա Դանիբեկյանը մերժել էր ՀՀ ԱԺ պատգամավոր Արմեն Գևորգյանի դիմումը, թույլ չէր տվել լքել երկիրը՝   ԵԽԽՎ լիագումար նիստին։

Լուսինե Սահակյանի փորձերը ապահովելու Գևորգյանի՝ հայտարարություն ունենալը, ապարդյուն էին։

Սահակյանն ասաց՝ իր տպավորությամբ դատավոր Դանիբեկյանը ցանկանում է Գևորգյանին զրկել պաշտպան ունենալու հնարավորությունից, բազմաթիվ դատական նիստերի ընթացքում չի եղել մի դեպ, երբ դատարանն արգելի պաշտպանին իրացնելու իր իրավունքները։

«Ես նոր եմ ներգրավվում որպես պաշտպան, Ձեզ ուղղակի խնդրում եմ՝ հարգեք Քրեական դատավարության օրենսգիրքը և իրականացրեք արդարադատություն, պահպանեք կարգը և թույլ տվեք, որպեսզի շարունակենք այս դատավարությունը։ Չի կարող պաշտպանը նստել ու տեսնել, թե ինչպես են խախտվում իր պաշտպանյալի իրավունքները։ Էրիկ Ալեքսանյանն իր գործողություններով արդեն իսկ դա ցույց տվեց, հարգելի դատարան։ ԵՍ նման նպատակ չունեմ, բայց չեմ կարող թույլ տալ, որ իմ պաշտպանյալի իրավունքները խախտվեն»,-ասաց նա՝ ավելացնելով, որ այստեղ է իրավունք իրացնելու համար։

Ի պատասխան, դատավոր Դանիբեկյանը հայտարարեց, որ սանկցիա է կիրառում Լուսինե Սահակյանի նկատմամբ։

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը նկատեց, որ դատավարությունը պիտի ընթանա ՀՀ Քրեական դատավարության օրենսգրքով սահմանված կանոններով․ ըստ այդմ՝ մեղադրյալն իրավունք ունի առարկել նախագահող դատավորի գործողությունների դեմ, նույն իրավունքը սահմանված է նաև պաշտպանի համար։ 

«Ձեր իրականացրած դատավարությունը էապես շեղվում է Քրեական դատավարության օրենգրքից։ Ես ոչ թե խնդրում եմ, արդեն պահանջում եմ, որ դատարանը դատավարությունն իրականացնի Քրեական դատավարության օրենգրքով սահմանված կարգի համաձայն, չխախտել պաշտպանների իրավունքները։ ԵՍ պահանջում եմ, որ դատարանը հարգալից վերաբերվի պաշտպանական կողմի իրավունքների նկատմամբ»,-ասաց Ալումյանը՝ պահանջելով դատարանից հարգել պաշտպանական կողմի իրավունքները և չխախտել դրանք։ 

Գործի նյութերին ծանոթանալու համար դատարանը Լուսինե Սահակյանին մեկ շաբաթ ժամանակ տրամադրեց և այսօրվա դատական նիստը հետաձգեց մինչև հոկտեմբերի 5-ը։