Ձեր վստահելի աղբյուրը

Առողջապահական հասարակական կազմակերպությունը այսօր առողջապահության նախարարության դիմաց բողոքի ակցիա է կազմակերպել՝ պահանջելով նախարարից չեղարկել որոշումը, ըստ որի հոկտեմբերի 1-ին բոլոր աշխատակիցները կամ պետք է պատվաստվեն կորոնավիրուսի դեմ, կամ ամսական երկու անգամ ՊՇՌ թեստ հանձնեն:

Կազմակերպության նախագահ բժիշկ Հովհաննես Գևորգյանը հայտնեց, որ ուզում են հանդիպել առողջապահության նախարարության ներկայացուցչի հետ։

«Ինչի համար է այս գերատեսչությունը, մենակ անհայտ պատվաստանյութերով սրսկելո՞ւ։ Ամբողջ առողջապահական ծառայության ֆինանսները փակել եք»,- նախարարության դիմաց գոռաց նա։

Այդ ժամանակ նրան մոտեցավ ոստիկաններից մեկը և զգուշացրեց, որ եթե հասարակական կարգը խախտի, նրան բերման կենթարկեն: Որոշ ժամանակ անց  բժշկին բերման ենթարկեցին: Կան այլ բերման ենթրակված քաղաքացիներ ևս։ 

Ակցիայի մասնակիցներից մեկը նշեց, որ իրենք հավաքվել են առողջապահության նախարարության դիմաց՝ ընդունելություն խնդրելով, իրենց հարցադրումները կապված են ամսական երկու անգամ պարտադիր վճարովի թեստավորման կամ պատվաստման և մարդկանց անհիմն աշխատանքից ազատելու հետ:

«Սկզբում նախարարությունից ասել են՝ 5 րոպեից կպատասխանեն ընդունելության վերաբերյալ, սակայն  պատասխան չկար։ Նորից փորձեցինք  պարզել՝ կլինի՞ ընդունելություն, թե՞ ոչ։ Այդ ընթացքում ոստիկանները բերման ենթարկեցին բժիշկ Հովհաննես Գևորգյանին։ Մեզ համար անհասկանալի է պատճառը»,- նշեց ակցիայի մասնակիցը։

Նա նշեց, որ այս նախարարության շենքում տիրում են մի շարք ապօրինություններ։

«Նախկինում ՊՇՌ թեստը եղել է 15-20 հազար դրամ, հիմա ինչ-որ կախարդական ձեռքով դարձել է 5-6 հազար դրամ: Դա նշանակում է, որ առողջապահության նախարարությունում մեծ կոռուպցիոն ռիսկեր է եղել: Եթե կար հնարավորություն մեկ օրում թեստի արժեքը դարձնել 6-7 հազար, այդքան գումարներն ում գրպանն է գնացել, ո՞վ է յուրացրել այդ փողերը: Մեր պահանջը դա է և այն, որ չպարտադրեն մարդկանց պատվաստվել»,- նշեց ակցիայի մասնակիցը։