Ձեր վստահելի աղբյուրը

«Վերջին երկու նիստերին իմ կողմից օրակարգ էին բերվում հարցեր, որոնք մահացու վտանգավոր են իշխանության համար»,- ԱԺ-ում լրագրողների հետ ճեպազրույցում ասաց «Հայաստան» խմբակցության անդամ Արթուր Ղազինյանը։

Հիշեցնենք, որ այսօր ԱԺ պաշտպանության և անվտանգության հարցերի հանձնաժողովի նիստում նա առաջարկեց ստեղծել ենթահանձնաժողով, որը պետք է պարզի հոկտեմբերի 7-ին պատերազմը կանգնեցնելու ՌԴ առաջարկը մերժելու հանգամանքները, մոտիվացիան, պատճառները, որոշմանը մասնակցող սուբյեկտների շրջանակը, նրանց կոմպետենտությունը, ստացված տեղեկատվության համարժեքությունն այդ որոշման կայացման համար։ Սակայն այն օրակարգ չընդգրկվեց։

«Իմ առաջարկները վտանգավոր են իշխանության համար, քանի որ պարունակում են Քրեական օրենսգրքի հատկանիշներ, որ տեղի է ունեցել հանցագործություն, հոկտեմբերի 7-ին պատերազմը պետք է կանգնեցվեր, բայց չկանգնեցվեց առայժմ հասնելի մեկ անձի որոշումով։ Հիմա փորձում ենք հասկանալ՝ այդ մեկ անձից զատ ո՞վ է մասնակցել այդ որոշման կայացմանը, համապատասխանատու այդ որոշման, դրա հետևանքների համար։ Մեր նպատակը դա էր, դա ևս մերժվեց»,- ասաց Ղազինյանը։

Ըստ նրա, իր առաջարկը մերժվեց, քանի որ ստիպված էին լինելու, նույն հանձնաժողովի նախագահ Անդրանիկ Քոչարյանը, գալ ենթահանձնաժողով, ներկայացնել տեղեկատվություն ու պատասխանել հարցերի, քանի որ պատերազմի ժամանակ նա Հայաստանի ռազմաքաղաքական իշխանության բաձրագույն ներկայացուցիչն էր՝ լինելով 7-րդ գումարման Ազգային ժողովի պաշտպանության և անվտանգության հարցերի մշտական հանձնաժողովի նախագահը, ինքը ևս պետք է քննվեր այդ ենթահանձնաժողովի կողմից։

«Դա խոսում է այն մասին, որ եթե իշխանությունները որոշեն ստեղծել քննիչ հանձնաժողով, այն չի կարող ղեկավարվել այդ քննվող առարկայի մեջ էական և կարևոր դերակատարություն ունեցած մարդու կողմից։ Քննիչ հանձնաժողովը չի կարող ղեկավարել Անդրանիկ Քոչարյանը, նա իրավունք չունի ղեկավարել այն»,- ասաց ընդդիմադիր պատգամավորը։

Անդրադառնալով Անդրանիկ Քոչարյանի այսօրվա առաջարկին, որ եթե առաջիկա մեկ ամսվա ընթացքում հանձնաժողովի նախագահի տեղակալի պաշտոնում կրկին առաջադրվի նույն թեկնածուն և չընտրվի, ապա ՔՊ խմբակցությանը հարկադրված կլինեն առաջարկել հանդես գալ նախաձեռնությամբ և հարցը կարգավորել, Ա. Ղազինյանն, ում արդեն  հինգ անգամ ՔՊ-ական պատգամավորները չեն ընտրում ԱԺ պաշտպանության և անվտանգության հարցերի հանձնաժողովի նախագահի տեղակալի պաշտոնում, ասաց. «Իրենց իրավունքն է, թող բերեն այդ հարցը լիագումար նիստ, օրենքի փոփոխությունը կքննարկվի քաղաքական հարթության վրա, կհնչեն բոլոր գնահատականները, որակումները»։

Հարցին՝ ըստ էության մեկ ամիս ժամանակ են տվել իրեն ընտրության համար, շարունակելո՞ւ է մեկ ամսվա ընթացքում նորից առաջադրվել, Ա. Ղազինյանը պատասխանեց. «Այստեղ կա երկու կարևոր հարց՝ իշխանությունը ոչ մի բարոյական իրավունք չունի պարտադրելու ընդդիմությանը վարքագիծ, պարտավոր են հարգել ընդդիմության դիրքորոշումը և կատարել իրենց քվեարությունը։

Երկրորդ՝ հրաժարվել, նշանակում է այդ պաշտոնը, դիրքը հանձնել իշխանությանը։ Հետևաբար, այս երկու սկզբունքներից ելնելով՝ ընդդիմությունը չի կարող  ենթարկվել Անդրանիկ Քոչարյանի պահանջին և փոխել թեկնածուին և նախագահի տեղակալի կարգավիճակը հանձնել իշխանությանը»։

Նա ասաց, որ հանձնաժողովի նախագահի տեղակալը պաշտոն չի համարում, եթե իր համար սկզբունքային լիներ ընտրվել հանձնաժողովի նախագահի տեղակալ, վաղուց լուծած կլիներ այդ հարցը։

«Ձևերը տարբեր են։ Ունեմ սկզբունքային դիրքորոշում, կա թեկնածու, որն առաջադրվել է, իշխանության վարքագիծը ստիպեց ընդդիմությանը մնալ կոշտ դիրքերում։

Իրենք սրա համար կրում են քաղաքական պատասխանատվություն՝ հանձնաժողովի աշխատանքը կազմալուծված է, անգործունակ է, քանի որ բովանդակային հարցերի քննությունը և խորհրդարանական վերահսկողությունը, որ պետք է իրականացնի հանձնաժողովը, 5 անգամ նիստ է հրավիրվել, 5 անգամ էլ տեղի չի ունեցել։ Սա իմ որակումն է, գնահատականն է, շատ ավելի կարևոր գնահատական կա, որ հանձնաժողովի նախագահը չի տիրապետում իրավիճակին»,- ասաց Արթուր Ղազինյանը։

նա նշեց, որ Հայաստանի պաշտպանության և անվտանգության համակարգում տիրող աղետալի, կոլապսային իրավիճակում հանձնաժողովը համարժեք չէ։

«Տպավորություն է ստեղծվում, որ Հայաստանի պաշտպանությանն ու անվտանգությանը սպառնացող համար մեկ վտանգը հանձնաժողովի նախագահի տեղակալի ընտրվելը կամ չընտրվելն է։ Դա բխում է հանձնաժողովի նախագահի կողմից կազմվող օրակարգից», - ասաց Արթուր Ղազինյանը։