Ձեր վստահելի աղբյուրը

Երևանի ընդհանուր իրավասության Շենգավիթ նստավայրում դատավոր Աննա Դանիբեկյանի նախագահությամբ այսօր շարունակվում է Սիլվա Համբարձումյանի գործով քննությունը։

Դատավարության մասնակիցներին Աննա Դանիբեկյանը տեղեկացրեց, որ դատարանը ստացել է փաստաբան Ալեքսանդր Կոչուբաևի դիմումը։ Նա հայտնել է, որ ստանձնել է Արմեն Գևորգյանի շահերի պաշտպանությունը, նաև տեղեկացրել է՝ չի կարող ներկայանալ այս դատական նիստին նախապես նշանակված այլ դատական նիստին մասնակցելու պատճառով, նաև խնդրել է ժամանակ տրամադրել գործի նյութերին ծանոթանալու համար։

Արմեն Գևորգյանի պաշտպանությունը կիրականացնի նաև փաստաբան Լուսինե Սահակյանը, ով տարբեր գործերով հանդես է եկել որպես Գևորգյանի փաստաբան։ Նա ասաց, պաշտպանելու է Արմեն Գևորգյանի շահերն այն մեղադրանքներով, որոնք այս պահին առկա են։

«Այս գործով շահերի բախում կար, քանի որ մարտի 1-ի գործով ես ներկայացրել եմ այլոց, այդ թվում նաև Նիկոլ Փաշինյանի շահերը։ Քանի որ այս պահին ըստ էության այդ մեղադրանքով կա հետապնդման դադարեցում, բայց նկատի ունենալով, որ դատախազները բերել են վերաքննիչ բողոք ու չգիտենք, ինչ ընթացք կունենա, մենք որոշեցինք, որ ես կներկայանամ դատական նիստերին»,-ասաց Սահակյանն ու դատարանին խնդրեց դա հաշվի առնել։

Լուսինե Սահակյանին որպես պաշտպան ներգրավվելու հարցի քննարկման ժամանակ դատախազներից մեկն ասաց՝ առարկություն չունի, մյուսը՝ Գևորգ Բաղդասարյանը հարցրեց, ինչպե՞ս են պատկերացնում մի մեղադրանքով Լ. Սահակյանը պաշտպանում է Գևորգյանին, մյուսով՝ ոչ։

Փաստաբանն էլ դատախազին հիշեցրեց՝ նախ վերաքննիչ դատարանը դատական ակտ չի կայացրել, ապա կարծիք հայտնեց, որ անձն իրավունք ունի ընտրել իր պաշտպաններին, որոնք պետք է ներկայացնեն իրեն տարբեր գործերով, մեղադրանքներով,  պաշտպանվել այնպես, ինչպես ինքն է ցանկանում։

«Ավելին ասեմ, անձը կարող է ընտրել մեկ իրավունքի խախտման հարցով առանձին պաշտպան, դա նախատեսված է Սահմանդրությամբ, Կոնվենցիաներով։ Քրեական դատավարության օրենսգիրքն իր մեջ շատ հստակություններ չի նախատեսում, չի նախատեսում օրինակ մասնակի ներգրավվում մի մեղադրանքով, բայց դա անձի խնդիրը չէ։ Անձի իրավունքը չի կարող ոտնահարվել, քանի որ Քրեական դատավարության օրենսգիրքն ունի բացեր։ Ես գտնում եմ, որ Արմեն Գևորգյանն իրավունք ունի պաշտպանվելու իր ընտրած պաշտպանի կողմից, ես որևէ խնդիր չեմ տեսնում»,-ասաց Լուսինե Սահակյանը։ 

Դատավոր Դանիբեկյանը հիշեցրեց, որ այս պահին գործի քննությունն ընթանում է Քր. Օրենսգրի 311 հոդվածի 4-րդ մասի 2-րդ կետով և 197 հոդվածի 2-րդ մասի 11-ին կետով առաջադրված մեղադրանքների մասով։

«Հետևաբար կողմերի բարձրացված հարցի քննարկումը դատարանը գտնում է առարկայազուրկ»,-ասաց Դանիբեկյանը։

Պաշտպաններից Հայկ Ալումյանն ասաց՝ որևէ պրոբկեմ չի տեսնում, որպեսզի փաստաբան Լուսինե Սահակյանն այս գործով ներգրավվի որպես պաշտպան։

«Բայց այստեղ ոչ պաշտպանական կողմի պատճառով կուրիոզային իրավիճակ է ստեղծվել, հիմա հայտնի չէ, թե գործը ո՞րն է։ Քանի որ պաշտպանը պետք է ներգրավվի ոչ թե դատավարությանը, այլ գործին։ Օրենքում այդպես է գրված։ Հիմա վերաքննիչ դատարանում ու այստեղ քննվող գործը նո՞ւյն է։ Իհարկե նույնն է, համարը նույնն է, գործը նույնն է, բայց նույն գործը երկու դատարանում քննվել չի կարող»,-ասաց Ալումյանը՝ ակնկալելով դատարանից այդ հարցի վերաբերյալ հստակ դիրքորոշում։

Դատավոր Դանիբեկյանն ասաց՝ դատարանը որևէ խոչընդոտ չի տեսնում Լուսինե Սահակյանի մասնակցության համար սույն քրեական գործով որպես Արմեն Գևորգյանի շահերի պաշտպան, հետևաբար նա ներգրավվում է որպես Գևորգյանի շահերի պաշտպան։

Լուսինե Սահակյանը տեղեկացրեց, որ գործի նյութերին ծանոէ չէ, միջնորդություն է ներկայացնելու, բայց մինչ այդ Արմեն Գևորգյանը հայտարարություն ունի։

Հիշեցնենք, որ սեպտեմբերի 7-ի դատական նիստում Արմեն Գևորգյանի պաշտպան Էրիկ Ալեքսանյանը հայտարարեց. «Ես չեմ կարող սույն գործով շարունակել իրականացնել Արմեն Գևորգյանի շահերի պաշտպանությունը։ Դուք անձնական հակակրանք ունեք իմ նկատմամբ, հստակ դա ցույց եք տալիս, ինչը հանգեցնում է նրան, որ Արմեն Գևորգյանի իրավունքները և օրինական շահերը կոպտագույն ձևով ոտնահարվում են։ Այդ պատճառով հետայսու սույն գործով չեմ կարող պաշտպանել Գևորգյանի շահերը։ Խնդրում եմ Արմեն Գևորգյանի դիրքորոշումը ճշտելուց հետո դադարեցնել իմ պարտականությունները՝ որպես նրա պաշտպանի»։

Ալեքսանյանը հիշեցրեց, որ ինքը դատական վեճի մեջ է դատավոր Դանիբեկյանի հետ, փորձում է հասնել նրան քրեական պատասխանատվության ենթարկելուն, ինչի հետևանքով Դանիբեկյանը հակակրում է իրեն, այլևս չի կարողանում զսպել իր էմոցիաները իր նկատմամբ, դրա հետևանքով էլ կոպտագույն կերպով ոտնահարվում են Արմեն Գևորգյանի օրինական շահերն ու իրավունքները։

ԵԴ/0253/01/19 գործով մեղադրական եզրակացության մեջ մասնավորապես նշվում է, որ ՀՀ երկրորդ նախագահ Ռոբերտ Քոչարյանն իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։

«Թի Էս Էս Սի Արմենիա» ՍՊ ընկերության միակ մասնակից ու տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վճարելու գործարքին չխոչընդոտելու համար, 2008թ․ ապրիլին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք, ինչպես նաև նույն ժամանակ թաքցնելով ու խեղաթյուրելով նշված գումարի իրական բնույթն ու ծագումը՝ օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հիշեցնենք, որ ՍԴ-ն հակասահմանադրական էր ճանաչել նույն գործով մեկ այլ մեղադրանքի հոդված. Քրեական օրենսգրքի 300.1 հոդվածը, որով մեղադրանք էր առաջադրված Ռոբերտ Քոչարյանին, Արմեն Գևորգյանին, Սեյրան Օհանյանին, Յուրի Խաչատուրովին ճանաչվել էր Սահմանդրությանը հակասող։

ՍԴ որոշումից հետո ընդհանուր իրավասության դատարանի որոշմամբ նրանց նկատմամբ քեական հետպնդումը դադարեցվեց։ Այժմ դատախազությունը Վերաքննիչ դատարանում բողոքարկում է այդ դատական ակտը։