Ձեր վստահելի աղբյուրը

«Նախագծով առաջարկվում է ավելացնել օրենքի գործողության ոլորտը՝ բացի անշարժ գույքից գնահատելով նաև շարժական գույքը, մեքենա-սարքավորումները, ոչ նյութական ակտիվները և այլն»,- Տնտեսական հարցերի մշտական հանձնաժողովում այսօր հայտնեց Կադաստրի կոմիտեի ղեկավարի տեղակալ Արման Պետրոսյանը՝ ներկայացնելով «Անշարժ գույքի գնահատման գործունեության մասին» օրենքում և հարակից օրենքների փաթեթում փոփոխություն կատարելու մասին նախագիծը:

Պետրոսյանը նաև հայտնեց, որ 2021թ-ից ԵԱՏՄ երկրներում գների ազատականացում է լինելու, միասնական շուկա է ձևավորվելու և պահանջներից մեկն այն է, որ անդամ պետություններն օրենսդրորեն կարգավորեն գույքի այլ տեսակների գնահատման գործընթացը:

«Նախագծի ընդունմամբ նաև հնարավորություն կստեղծվի ՀՀ որակավորված գնահատողներին 2025 թվականի հունվարի 1-ից ԵԱՏՄ անդամ պետությունների տարածքներում ևս իրականացնել գնահատումներ»,- հայտնեց Արման Պետրոսյանը:

Ըստ նրա՝ նախագծով առաջարկվում է ընդլայնել գնահատման մասնավոր դեպքերը, մասնավորապես՝ պետական կամ համայնքային գույքը վարձակալության տալու ու վարձակալելու և գույքի սեփականատիրոջը սնանկ ճանաչելու դեպքում հրապարակային սակարկության դեպքերը:

Տնտեսական հարցերի մշտական հանձնաժողովի նախագահ Վահե Հակոբյանը հայտնեց, որ նախագծի նախորդ քննարկումների ժամանակ տեխնիկական շտկումներ են արվել, իսկ բովանդակային հարցերը չի քննարկվել, հետևաբար՝ նախագծի քննարկումը պետք է հետաձգել:

Հանձնաժողովի փոխնախագահ ՔՊ խմբակցության անդամ Բաբկեն Թունյանն առաջարկեց և պնդեց, որ նախագիծը քննարկվի, քանի որ այն արդեն 4 տարի է շրջանառվում է:

Կադաստրի կոմիտեի ղեկավար Սուրեն Թովմասյանը, որը ներկա էր նիստին, հանդես եկավ օրենքների նախագծերի փաթեթը քննարկելու օգտին:

Մոտ մեկ ժամ տևած քննարկումից հետո հանձնաժողովը որոշեց նախագծերի փաթեթն ընդգրկել ԱԺ օրակարգ: