Ձեր վստահելի աղբյուրը

Մինչ կառավարության շենքի ներսում գործադիրի նիստն էր ընթանում, շենքի դիմաց մի քանի քաղաքացիներ այնտեղ նստածներին մեղադրում էին թալանի մեջ։

Ակցիայի մասնակից տղամարդն, օրինակ, առողջապահության նախարար Անահիտ Ավանեսյանից է ցանկանում հարցնել, ինչպե՞ս եղավ, որ 15 հազար դրամից թեստավորման արժեքն իջավ ու նույնիսկ 5 հազար դրամի հասավ։

Ասաց՝ տարբեր մարդկանցից, մասնագետներից ճշտել է, թեստի ինքնարժեքը 2000 դրամ է։

«Ստացվում է, որ այս կառավարությունը, որ բոլորին մեղադրում է թալանի համար, ինքն էլ քաղաքացիներին թալանել է։ Չգիտենք՝ ո՞ր կազմակերպությունը, ովքե՞ր մեկ տարվա մեջ 37 մլն դոլարի գերշահույթ են ունեցել։ Այսինքն, այս մեկ տարի և երկու ամսվա ընթացքում ինչ-որ մեկը լափել է 37 մլն դոլար, թալանել է Հայաստանի Հանրապետության հպարտ քաղաքացիներին։ Հիմա, իրենց խոսքով ասած, այդ լափած գումարից թող հոգան քաղաքացիների թեստավորման գումարը»,-ասաց ակցիայի մասնակիցը՝ ավելացնելով, որ խնդրի չլուծվելու դեպքում իրենք դուրս կգան ակցիաների։

Նրա խոսքով, իրենք այսօր ընդամենը ցանակնում են հանդիպել Ավանեսյանին ու ասել, եթե պետությունը պարտադրում է 15 օրը մեկ թեստավորում իրականացնել, ապա պարտավոր է ինքը վճարել այդ գումարը։

«Մեզ ասացին՝ ինքնարժեքը 2 հազար դրամ է։ Դա շատ չնչին գումար է, եթե հաշվենք, որ իրենք  մեկ ամիս պարգևավճար չստանան, կարող են այդ գումարը հոգալ։ Աշխատողների թեստավորման գումարը պետք է հոգա պետությունը»,-նշեց նա։

Նշենք, որ երեկ կատարվել է 7472 թեստավորում, սեպտեմբերի 28-ին և 27-ին՝ համապատասխանաբար  6402 և 4988 թեստավորում։  Ընդհանուր առմամբ, կատարվել է 1 712 685 թեստավորում:

Արդարադատության նախարարությունից այսօր հայտնեցին, որ ԱՆ աշխատակազմը, համաձայն Առողջապահության նախարարի 2021 թվականի օգոստոսի 20-ի N-65-Ն հրամանի, ՊՇՌ հետազոտության բացասական արդյունքը հավաստող սերտիֆիկատ ներկայացնելու պահանջը կիրառելու է 14․10․2021 թվականից։