Ձեր վստահելի աղբյուրը

Կառավրությունն այսօր չզեկուցվող 47 նախագծերի թվում ընդունեց «ՀՀ 2021 թվականի պետական բյուջեի մասին» օրենքում վերաբաշխում կատարելու հերթական նախագիծը, որով նախատեսվում է ՀՀ Սյունիքի մարզին հատկացնել 1 մլրդ դրամ:

Հիմնավորման մեջ ասվում է. «Ադրբեջանի Հանրապետության կողմից 2020 թվականի սեպտեմբերի 27-ին Արցախի Հանրապետության դեմ սանձազերված պատերազմական գործողությունների հետևանքով ՀՀ Սյունիքի մարզի մի շարք համայնքներ դարձել են սահմանամերձ։ Մարզի համայնքներում առկա են մի շարք սոցիալական և հրատապ խնդիրներ, որոնք ունեն առաջնահերթ լուծման կարիք։

Կառավարության որոշմամբ՝ նախատեսվում է ՀՀ Սյունիքի մարզում առաջնահերթ լուծում պահանջող հիմնախնդիրների լուծման նպատակով 15.12.2016թ. N 1299-Ն որոշմամբ ստեղծված ՀՀ Սյունիքի մարզի զարգացման և ներդրման հիմնադրամին հատկացնել 1,000,000.0 հազ. դրամ գումար՝ մարզային և համայնքային ենթակայության ենթակառուցվածքներում, ինչպես նաև բնակչության համար սոցիալական և կենսական նշանակություն ունեցող կարևորագույն և հրատապ ծրագրեր իրականացնելու համար»:

Փոխվարչապետ Սուրեն Պապիկյանը կառավարության նիստում տեղեկացրեց, որ նախարարական կոմիտեում քննարկել են հարցը և նպտակահարմար գտել ամեն անգամ տրամադրել 200-ական մլն դրամ:

«Այս նախագծով հաստատում ենք 200 մլն դրամի փոխանցումը Սյունիքի զարգացման հիմնադրամին՝ հաշվետվությունից հետո պատրաստակամություն հայտնելով տրամադրել նաև 800 մլն դրամը»,- ասաց փոխվարչապետը: