Ձեր վստահելի աղբյուրը

«Ես ինչպես աշխատել եմ, այդպես էլ շարունակում եմ աշխատել։ Երբ ես տեսնեմ, որ իմ գործելաոճի մեջ փոփոխություն կլինի, ես այլևս չեմ աշխատի», -Դատավորների ընդհանուր ժողովի մեկնարկից առաջ լրագրողների հետ զրույցում ասաց Վերաքննիչ քրեական դատարանի դատավոր Մխիթար Պապոյանը՝ պատասխանելով հարցին, թե արդյոք նոր իշխանությունների գալուց հետո փոփոխություն եղել է իր գործունեության մեջ:

Անդրադառնալով արդարադատության նախարարի հայտարարությանը, թե վեթինգի կարիք կա, դատավորն ասաց. «Ես չեմ կարող ասել, որ դատական իշխանությունը կատարյալ է, ինչպես կատարյալ չեն իշխանության մյուս ճյուղերը: Արդեն մոտ երեք տարի է վեթինգի մասին խոսվում է, մասնավորապես գործադիր և օրենսդիր իշխանության կողմից, ես ի վերջո, չհասկացա, թե վեթինգ ասվածն ինչ է, ինչ է լինելու, լինելու է, թե չի լինելու»:

Լրագրողի հարցին, թե մտավախություն չունի՞, որ անցանկալի դատավորներից իշխանությունը կփորձի ազատվել, Մ.Պապոյանը պատասխանեց. «Ես բացարձակ որևէ մտավախություն չունեմ, այդ թվում աշխատանքը կորցնելու: Այնուամենայնիվ, 40 դատավորի մասին, որ խոսվում է արդարադատության նախարարի կողմից, արդեն տարիներ շարունակ տարբեր դատավորների մասին տարբեր խոսակցություններ են լինում: Ի վերջո, ես ուզում եմ հասկանալ, թե որտեղից է  գալիս այդ խոսակցությունը, ցուցակում հայտնված այս կամ այն դատավորն ինչ է արել և ինչպես է իրեն դրսևորում: Եթե դրանք օպերատիվ տեղեկություններ են, ինչու օպերատիվ մարմինը  հետևողականորն չի աշխատում: Եթե դրանք ուղղակի ասեկոսեների արդյունք են, ապա ասեկոսեների արդյունքում գնահատական տալ դատավորին, կարծում եմ, սխալ է:

Եթե արդարադատության նախարարն իր աշխատասենյակում նստած ինչ-որ դատական ակտերին գնահատական տալով է գալիս այդպիսի եզրահանգման, դա մի ուրիշ խնդիր է, իսկ եթե օպերատիվ մարմինների կողմից տեղեկատվություն է, ապա ինչու է այդ տեղեկատվությունը հասնում արդարադատության նախարարին, ոչ թե հենց իրենք իրենց մարմիններում չեն ռեալիզացնում այդ օպերատիվ տեղեկությունները:

Այնուամենայնիվ, 3 տարի մենք անընդհատ լսում ենք, որ դատական համակարգում անհրաժեշտ է իրականացնել վեթինգ, որ այսքան տոկոսը սխալ է աշխատում, չպետք է աշխատի: Եթե դա իրականություն է, ապա ես կցանկանամ, որ այդ անձինք, որոնք թույլ են տվել սխալ, պատասխանատվության ենթարկվեն»:

Նա նշեց, որ իշխանության տարբեր հայտարարությունների պատճառով դատական  իշխանության վարականիշը որոշակիորեն նվազում է։

Հարցին՝ մամուլում լուրեր շրջանառվեցին, որ ԱԱԾ-ն Վերաքննիչ դատարանի մի շարք դատավորների, այդ թվում իրեն, գաղտնալսել են, դատավորը պատասխանեց. «Այդ լուրերը համապատասխանում են իրականությանը, եղել են այդպիսի գաղտնալսումներ: Մեծ հաշվով ուզում եմ հասկանալ, թե 2 ու ավելի տարի ձգվող քրեական գործն ինչ ելք է ունենալու:

Բոլորովին վերջերս կասեցվեց այդ քրգործը, այնուհետև վերսկսվել է, ստացել եմ համապատասխան որոշումները: Ինչ են քննում, ում վերաբերյալ են քննում, ինչու են այսքան երկար քննում, չեմ կարող պատասխանել:

Ես համբերատար կսպասեմ, հետևողական կլինեմ և իմ գնահատականը կտամ, երբ որ նախաքննության ավարտը կհայտարարվի:

Կարծում եմ՝ բոլոր նրանք, որոնք առնչվել են, ովքեր իմ սահմանադրական իրավունքը խախտել են, նրանք բոլորը պատասխան են տալու իրենց արած սխալի համար, այդ թվում նաև իմ կոլեգաները: Ընդ որում, բոլորի համար պարզ է, որ գաղտնալսումը և հեռախոսազանգերի վերծանումը ստանալը առանց դատարանի թույլտվության չի լինում։ Գիտեմ, թե որ դատավորն է այդ թույլտվությունը տվել»,- ասաց նա:

Հարցին՝ վերջին շրջանում կարգապահական վարույթներ են հարուցվում դատավորի նկատմամբ նրանց կայացրած դատական ակտերի հիմքով, այս հանգամանքն իրեն որքանո՞վ է կաշկանում, դատավոր Պապոյանն ասաց. «Չեմ ողջունում։ Իհարկե, ինձ չի կաշկանում։ Իսկ եթե հետևողական լինենք, կտեսնենք, որ ԲԴԽ-ն կարողանում է  կայացնել այնպիսի որոշումներ, որոնք օբյեկտիվ  իրականության մեջ դրական են գնահատվում։ Այսինքն այնպես չէ, որ դատական իշխանությունն այս պահին գտնվում է  հալածյալի վիճակով։ Իմ գնահատականն այս պահին այսպիսիսն է, իհարկե, որևէ երաշխիք չունեմ վաղվա օրվա հետ կապված»։