Ձեր վստահելի աղբյուրը

ՀՀ նախկին գլխավոր դատախազ, քննչական կոմիտեի նախկին նախագահ Աղվան Հովսեփյանը կմնա կալանավորված։ Վերաքննիչ քրեական դատարանը, դատավոր Սևակ Համբարձումյանի նախագահությամբ, մերժեց Աղվան Հովսեփյանին կալանավորելու, նաև՝ նրա ձերբակալությունն իրավաչափ ճանաչելու մասին դատարանի որոշման դեմ բողոքը։

Լրագրողների հետ զրույցում Ա. Հովսեփյանի պաշտպան Էրիկ Ալեքսանյանն ասաց, որ դատարանը հրապարակել է որոշման  եզրափակիչ մասը, պատճառաբանական մասին ծանոթ չեն, երբ ծանոթանան, նոր կարող են միանշանակ գնահատական տալ: 

Նա հայտնեց, որ վճռաբեկ բողոք կներկայացվի, դրանից հետո կքննարկվի նոր հանգամանքի ի հայտ գալու պայմաններում գրավի միջնորդություն ներկայացնելու հարցը:

«Հավատացեք, նման միջնորդություն ներկայացնելն ինքնանպատակ չէ, մենք գտնվում ենք բացառապես իրավաբանության դաշտում, հետևաբար, նման հանգամանք ի հայտ գալու պարագայում միջնորդություն կներկայացնենք, ի հայտ չգալու պայմաններում, բնականաբար,  դատարանին չենք ծանրաբեռնի»,- նշեց Է.Ալեքսանյանը։

Նա հայտնեց, որ Աղվան Հովսեփյանն առաջադրված մեղադրանքը չի ընդունում, գնահատում է ապօրինի։

«Իսկ ինչու ենք ասում խնդրահարույց: Մի քանի հոդվածով է մեղադրանք առաջադրված: Ունենք  բացառապես մեկ ցուցմունք, ասում է՝ կաշառք տալու նպատակը եղել է այն, որ ունեցել է մի քանի քրեական գործերով մեղադրյալի կարգավիճակ, իսկ Աղվան Հովսեփյանը, լինելով գլխավոր դատախազ, իբրև նրան հովանավորել է այդ քրեական գործերի շրջանակում, ինչի դիմաց ինքը «Երևան» հեռուստաընկերության բաժնեմասերի 50 տոկոսը փոխանցել է նրան որպես կաշառք:  Բայց ինչումն է կայանում այդ մեղադարանքի անհեթեթությունը: Այդ մեղադրանքի առնչությամբ չեն հարցաքննվել քննիչները, դատախազները, որոնք անցնում են այդ քրեական գործով:

Մեզ համար պարզ կլիներ՝ կաշառք ստանալը համապատասխանո՞ւմ է իրականությանը հովանավորչության տեսանկյունից այն առումով, եթե օրինակ այս կամ այն քննիչը կամ դատախազը ցուցմունք տար, որ, օրինակ, այս անձի նկատմամբ նման դրական վերաբերմունք է դրսևորվել, որովհետև այդ ժամանակվա գլխավոր դատախազն ասել է, որ այս գործի նկատմամբ պետք է առանձնահատուկ մոտեցում ունենալ։ Միգուցե տրամաբանությունը երևար, և մենք կարողանայինք խոսել մեղադրանքի առկայության մասին, բայց, փաստորեն, ստացվում է, որ այդ անձը քնել-արթնացել է, հիմա քննությանը հայտնում է, որ 50 տոկոս բաժնետոմս ինքը փոխանցել է Աղվան Հովսեփյանին, որ նա, լինելով գլխավոր դատախազ, հովանավորի, որ այս քրեական գործերով իր համար դրական ելք լինի:

Դժվար եմ պատկերացնում, որ այդ գործերով կհայտնվի մի քննիչ, դատախազ, ով կգա և կհայտնի, որ Վարշամ Ղարիբյանի վերաբերյալ կարճման կամ այլ դատավարական որոշում կայացվել է այն պատճառով, քանի որ գլխավոր դատախազն ասել է առանձնահատուկ վերաբերմունք ցուցաբերել»,- մանրամասնեց պաշտպանը:

Է. Ալեքսանյանը նշեց, որ եթե պաշտպանության կողմը միջնորդի այդ  գործը քննող քննիչները, դատախազները հարցաքննվեն, որոնք նշեն, որ երբեք ոչ մի հովանավորչություն չի եղել, որոշումները եղել են  իրենց համոզմունքների համաձայն, ապա այդ դեպքում ի՞նչ պետք է անեն այս գործով քննիչները, ապացույցների բավարար համակցություն չեն ունենա։

Անդրադառնալով մամուլում շրջանառվող լուրերին, ըստ որոնց Աղվան Հովսեփյանի վերաբերյալ քրեական գործը հարուցվել է հաղորդումը ներկայացնելուց ամիսներ անց, ինչը խախտում է, պաշտպանն ասաց, որ նյութերի նախապատրաստման ժամկետը 10 օր է, ինչի ընթացքում վարույթն իրականացնող մարմինը պետք է որոշում կայացնի քրեական գործ հարուցելու, մերժելու կամ ըստ ենթակայության ուղարկելու մասին։ 

«Այս դեպքում 10-օրյա ժամկետը խախտվել է, իսկ ժամկետի խախտմամբ քրեական գործի հարուցումն ապօրինի է, հետևաբար, դրանից հաջորդիվ բոլոր դատավարական, քննչական գործողությունները, դրանց  արդյունքում կայացված արձանագրությունները չեն կարող ճանաչվել օրինական: Առհասարակ վարույթը նման պայմաններում  օրինական  համարվել չի կարող»,- ասաց Աղվան Հովսեփյանի պաշտպանը։

Նա չբացառեց, որ հետագայում կբարձրացվի գործի վարույթը կարճելու հարցը, պաշտպանության կողմը օգտագործելու է իրավական առումով ամբողջ  գործիքակազմը որպեսզի հասնեն արդյունքի:

Հիշեցնենք, որ սեպտեմբերի 7-ին Երևանի ընդհանուր իրավասության դատարանի դատավոր Մնացական Մարտիրոսյանը բավարարել էր ՀՔԾ քննիչի միջնորդությունը ու ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանին կալանավորելու որոշում կայացրել:

Աղվան Հովսեփյանը ձերբակալվել է սեպտեմբերի 7-ի առավոտյան՝ 1,5 տարի առաջ հարուցված քրեական գործի շրջանակներում: Նրան մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 178-րդ հոդվածի 3-րդ մասի 1-ին կետով և 190-րդ հոդվածի 3-րդ մասի 1-ին կետով (3 դրվագ):

ՀՔԾ-ից հայտնել էին, որ Աղվան Հովսեփյանը, 2004 թվականի մարտի 18-ից մինչև 2013 թվականի սեպտեմբերի 13-ը զբաղեցնելով ՀՀ գլխավոր դատախազի, իսկ 2014 թվականի հուլիսի 18-ից մինչև 2018 թվականի հունիսի 11-ը՝ ՀՀ քննչական կոմիտեի նախագահի պաշտոնները, հիշյալ ժամանակահատվածում փաստացի մասնակցել է ձեռնարկատիրական գործունեություն իրականացնող մի շարք ՍՊ ընկերությունների կառավարմանը, բացի այդ ստացել է առանձնապես խոշոր չափերով` 190.000.000 ՀՀ դրամ կաշառք և խարդախության եղանակով կատարել առանձնապես խոշոր չափերով` 800.000.000 ՀՀ դրամ գույքի հափշտակություն: Ա. Հովսեփյանին մեղադրանք է առաջադրվել նաև հանցավոր ճանապարհով ստացված առանձնապես խոշոր չափերով` ընդհանուր 1.299.404.414 ՀՀ դրամ գույքը (փողերի լվացում) օրինականացնելու համար: