Ձեր վստահելի աղբյուրը

Հայաստանի նախկին փոխվարչապետ, «Հայաստան» խմբակցության պատգամավոր Արմեն Գևորգյանի պաշտպան Լուսինե Սահակյանն այսօր միջնորդություններ ներկայացրեց՝ ապահովելու Գևորգյանի ազատ ու մշտական տեղաշարժի հնարավորությունը, ինչպես նաև Գևորգյանի դեպքում ճանաչել բացարձակ անձեռնմխելիությունը։

«Հարգելի դատարան, Արմեն Գևորգյանի վերաբերյալ եղել են Հայաստանից մեկնելու թույլտվության միջնորդություններ, սակայն դուք թույլ չեք տվել։ Թույլ չեք տվել պարոն Գևորգյանին մեկնել ԵԽԽՎ, բարձրացնել ռազմագերիների ու այլ հարցեր։ Դուք թույլ չեք տվել, որպեսզի Հայաստանի Հանրապետության շահերից բխող գործողություններ կատարվեն»,-Երևանի ընդհանուր իրավասության դատարանի Շենգավիթ նստավայրում միջնորդությունը ներկայացնելիս հայտարարեց «Հայաստան» խմբակցության պատգամավար Արմեն Գևորգյանի պաշտպան Լուսինե Սահակյանը՝ դիմելով նիստը նախագահող դատավար Աննա Դանիբեկյանին։

Փաստաբանն իր խոսքում ընդգծեց, միջազգային փաստաթղթերը, կոնվենցիաները ստեղծված են այն բանի համար, որ ոչ մի անդամ պետություն իրավունք չունենա արգելելու ներկայացուցչին հասնելու վեհաժողովի, նստաշրջանների վայր ու իրականացնել իր լիազորությունները։

«Սա Հայաստանի Հանրապետության համար լուրջ հարված է, հարգելի դատարան»,-ասաց Սահակյանն ու կասկած հայտնեց, որ դատարանը կամ տեղյակ չի եղել միջազգային փաստաթղթերին, հակառակ դեպքում Հայաստանի Հանրապետությունը չի կատարում իր պարտականությունները։

Նա ընթերցեց վկայակոչվող միջազգային փաստաթղթից մի հատված. «Իրավասու ազգային դատարանի պարտականությունն է ճանաչել, որ ներկայացուցիչը կամ նախկին ներկայացուցիչն օգտվում է բացարձակ անձեռնմխելիությունից՝ դրանից բխող հետևանքներով։ Հիմա ես ասում եմ, ճանաչել, որ Արմեն Գևորգյանն օգտվում է այդ անձեռնմխելիությունից։ Հաջորդը, հարգելի դատարան,  ապահովել նրա մշտական անարգել ազատ տեղաշարժման հնարավորությունը»,-ասաց պաշտպանը՝ հիշեցնելով, որ միջազգային ատյանում Արմեն Գևորգյանը հանդիսանում է ՀՀ ներկայացուցիչը և պետք է իրականացնի իր պարտականությունները։

Լուսինե Սահակյանն ընդգծեց, որ այդ անձեռնմխելիությունը չի սահմանփակվում որևէ գործով։ Պետք է լինի մշտական անարգել տեղաշարժի հնարավորություն, քանի որ ԵԽԽՎ անդամ լինելը ենթադրում է նաև տարբեր հանդիպումների, հանձնաժողովների նիստերի, քննարկումների մասնակցություն ոչ միայն նստաշրջանների շրջանակում։

«Սա պարզագույն միջնորդություն է։  Կա պարտականություն՝ դրված  պետության ու դատարանի վրա», - ասաց Սահակյանը՝ հիշեցնելով, որ միջազգային փաստաթղթերի ներքո ստորագրել է Հայաստանի Հանրապետությունը, ստանձնել միջազգային պարտավորություն, հետևաբար այն պետք է կատարվի։

Արմեն Գևորգյանն էլ դատարանին տեղեկացրեց, որ քիչ առաջ՝ հենց դատական նիստի ընթացքում ԵԽԽՎ-ից հիշեցում է ստացել, որպես ԽՎ հայաստանյան պատվիրակության անդամ պետք է ներկայացնի իր հայտարարագիրը։

«Այսինքն, անընդհատ գործընթացներ են տեղի ունենում։ Հիմա եթե սեպտեմբերի 27-ին դատարանը թույլ տար ինձ մեկնել ԵԽԽՎ, այսօր ԱԺ-ում մի քանի պատգամավորներ մեզ չէին ասի՝ ո՞ւր էիք, ինչի՞ ԵԽԽՎ-ին  չէիք մասնակցում, որ ազգային շահերը ներկայացնեիք։ Հիմա ես ստիպված ԵԽԽՎ-ին ներկայացրել եմ այս իրավիճակը, որովհետև սա արդեն ներպետական խնդիր չէ, դառնում է միջազգային կառույցի քննարկման առարկա», - ասաց Գևորգյանը։

Դանիբեկյանը, լսելով դատավարության մասնակիցներին, ասաց՝ դատարանը չի կարող լուծում տալ անձեռնմխելիության միջնորդությանը՝ «մինչև միջնորդության լուծման համար էական նշանակություն ունեցող հանգամանքների պարզումը»։  

Անդրադառնալով Գևորգյանի՝ ՀՀ-ից մեկնելու համար թույլտվություն ստանալու հարցին, դատավորը նշեց, որ ամեն անգամ դատարանը կքննարկի ՀՀ-ից Արմեն Գևորգյանի մեկնելու հարցը։

Հիշեցնենք, որ դատարանն ընդդիմադիր գործչին թույլ չէր տվել ԵԽԽՎ հայաստանյան պատվիրակության կազմում մեկնել Ստրասբուրգ։ Արմեն Գևորգյանի մեկ այլ պաշտպան՝ Էրիկ Ալեքսանյանն ավելի վաղ հայտնել էր, որ Աննա Դանիբեկյանի կողմից Արմեն Գևորգյանին Ստրասբուրգ մեկնելու թույլտվություն տալը մերժելու մասին կայացրած դատական ակտն իր կողմից բողոքարկվել է ՀՀ վերաքննիչ դատարան։