Ձեր վստահելի աղբյուրը

«Փոփոխության նպատակը բնակարան, կամ անհատական բնակելի տուն ձեռք բերելու կամ կառուցելու համար ներգրավված հիպոտեկային վարկի սպասարկման տոկոսներից եկամտահարկի հետ վերադարձնելու համակարգի վերանայումն է»,- ԱԺ-ում հայտարարեց Ֆինանսների նախարարի տեղակալ Արման Պողոսյանը՝ ներկայացնելով Հարկային օրենսգրքում լրացումներ կատարելու մասին նախագիծը:

Նա հայտնեց, որ Երևանի բնակարանների համար եկամտահարկի վերադարձի մեխնիզմի աստիճանական վերադարձմամբ կառավարությունը ցանկանում է հավասարաչափ զարգացում ապահովել կառուցապատման առումով և համակարգին հաղորդել լրացուցիչ սոցիալական նշանակություն:

Պողոսյանը տեղեկացրեց, որ սահմանափակումները չեն տարածվի արդեն իսկ գործող վարկերի վրա։

Օրենսգրքի նախագծով նախատեսվում է 2022 թվականի հուլիսի 1-ից հետո դադարեցնել Երևանի առաջին գոտում բնակարան ձեռք բերելու համար հիպոտեկային վարկի եկամտային հարկի փոխհատուցումը, 2023 թվականի հունվարի 1-ից՝ երկրորդ գոտում, 2023 թվականի հուլիսի 1-ից՝ երրորդ գոտում, իսկ 2025 թվականի հունվարի 1-ից՝ նաև ողջ Երևանի տարածքում գնվող բանկարանների համար:

«Հայաստան» խմբակցության պատգամավոր Թադևոս Ավետիսյանն իր ելույթում նկատեց, որ Երևանում այդ սահմանափակում իրականացնելը նախընտրելի չէ պոտենցիալ շահառուների համար, որոնք մտադիր էին և կարող էին դրանով բնակարան ձեռք բերել:

Անդրադառնալով նախագծի սոցիալական բնույթի մասին կառավարության ներկայացուցչի պնդմանը՝ նա ասաց, որ Երևանում կարելի է ավելի շուտ սոցիալական բնակարան գնել, քան նրա սահմաններից դուրս, քանի որ այն կախված է, ոչ թե տեղանքից այլ բնակարանի գնից:

«Եթե ուզում եք, որ նախագիծն ունենա սոցիալական բաղադրիչ, ապա ծրագիրը պետք է կապվի  դրանից օգտվող ընտանիքների երեխաների թվի, սահմանամերձ գոտիների և անձի սոցիալական կարգավիճակի հետ, ինչը չկա օրինագծում»,- հայտնեց պատգամավորը: