Ձեր վստահելի աղբյուրը

Ս.թ. սեպտեմբերի 24-ից հոկտեմբերի 1-ը, քրդական կողմի հրավերով, Իրաքյան Քուրդիստան (ԻՔ) այցելեց Մարոկկոյում և Թունիսում ՀՀ արտակարգ և լիազոր դեսպան, արաբագետ, աղբյուրագետ, քրդագետ, պատմական գիտությունների դոկտոր, պրոֆեսոր Արշակ Փոլադյանը: Այս մասին հայտնում է Իրաքում Հայաստանի դեսպանությունը։

Նշվում է, որ այցի ընթացքում դեսպան Փոլադյանը Էրբիլի, Դհոկի և Սուլեյմանիեի մի շարք համալսարաններում հանդես է եկել ծավալուն դասախոսություններով հայ-քրդական պատմական առնչությունների, քրդերի ծագման, Հայաստանում քրդագիտության վերաբերյալ, պատասխանել պրոֆեսորադասախոսական կազմի և ուսանողների բազմաթիվ հարցերին:

ԻՔ-ում գտնվելու ընթացքում դեսպան Փոլադյանը հանդիպել է նաև ԻՔ մի շարք բարձրաստիճան պաշտոնյաների հետ, քննարկվել են հայ-քրդական հարաբերություններին առնչվող հարցեր, ելույթ է ունեցել արտաքին հարաբերությունների դեպարտամենտի անձնակազմի համար:

Սեպտեմբերի 28-ին կայացել է Ա.Փոլադյանի հանդիպումը ԻՔ Գիտությունների ակադեմիայի ղեկավարության և ԻՔ տարբեր համալսարանների պրոֆեսորադասախոսական կազմի հետ: Մի շարք համալսարանների ներկայացուցիչներ իրենց ելույթներում նշել են, որ ԲՈւՀ-երի ուսանողների համար պատրաստված քրդերի միջնադարյան պատմության դասագրքերում ընդգրված են նաև պրոֆեսոր Փոլադյանի աշխատությունները:

Հանդիպման վերջում ԻՔ գիտությունների ակադեմիայի նախագահ, դոկտոր, պրոֆեսոր Աբդ ալ Ֆաթթան Ալի Բութանին հայտարարել է, որ ակադեմիայի գիտական խորհուրդը, որպես գնահատանք քուրդ ժողովրդի պատմության, ժառանգության և թարգմանության բնագավառներում ունեցած ջանքերի և այդպիսով քուրդ ժողովրդին մատուցած ծառայությունների, 2021թ. սեպտեմբերի 26-ին միաձայն կայացրել է թիվ 13 որոշումը, որով դեսպան, դոկտոր Փոլադյանն ընտրվել է ԻՔ Գիտությունների ակադեմիայի պատվավոր անդամ։