Ձեր վստահելի աղբյուրը

«Հայաստանի երկրորդ նախագահի ցանկացած ակտիվություն Ալիևի մոտ առաջացնում է  նյարդային ջղաձգումներ՝  շատ լավ հասկանալով,  թե ինչ է նշանակում իր և իր պետության համար երկրորդ  նախագահի վերադարձն իշխանության»,- ԱԺ-ում լրագրողների հետ ճեպազրույցում ասաց «Հայաստան» խմբակցության  պատգամավոր Արթուր Ղազինյանը՝  անդրադառնալով Ադրբեջանի նախագահի հայտարարությանը, որ Հայաստանում որևէ մեկը ռևանշի մասին չմտածի:

Նա նշեց, որ Ադրբեջանի նախագահը վախեցած է, սարսափած է այդ մտքից, և մի լավ ասացվածք կա՝ «արջն իր ահից գոռում է», այս պարագայում ինքը գոռում է:

Պատասխանելով հարցին՝ թվում էր, թե ընդդիմությունն իր ճանապարհով պետք է ընթացք տար, փորձեր բացահայտել Ալիևի հետ 5 միլիարդի գործարքի վերաբերյալ հայտարարություններին, Ա. Ղազինյանն ասաց. «Այդ առաջարկը նոր չէ, արվել է դեռևս 2011 թվականից:  Ադրբեջանի առաջարկությունն է եղել և հիմքը հետևյալն է՝  միևնույնն է, այսպես թե այնպես հարցը պետք է մի օր լուծվի, որպեսզի պատերազմ չլինի, մենք առաջարկենք այն գումարը, որը պետք է ծախսենք պատերազմի վրա, փոխանցենք ձեզ, տվեք ձեր քաղաքացիներին, կուզեք պահեք ձեզ: 

2018 թվականից հետո ստեղծված օպերատիվ կապի շրջանակներում էլ  նույն առաջարկն արվել է, ընդ որում գրավոր: Առաջարկը ներկայացվել է Փաշինյանին: Չգիտենք՝ մերժում է եղել, թե հավանություն:  Գրավոր է ներկայացվել, ենթադրում եմ՝ պատասխանը պետք է գրավոր լիներ:

Հիմա մի հարց՝ այն, ինչի համար առաջարկվում էր 5 միլիարդ, այժմ գտվում է Ադրբեջանի վերահսկողության տակ: Հիմա եկեք հասկանանք՝ 5 միլիարդի գործարքը եղե՞լ է, թե՞ ոչ»:

Ա. Ղազինյանն ասաց, որ պետական դավաճանության հոդվածով 5 հաղորդում է ներկայացվել, որից մեկը հենց ինքն է ներկայացրել: 

«Իրավապահ համակարգը հրաժարվում է իրավական ճանապարհով քննել պատերազմը, քննել դավաճանության հանգամանքը, արգելափակում է մեր բոլոր փորձերը՝ սահմանադրաիրավական ճանապարհով այս ճգնաժամին լուծում տալ»,- ասաց ընդդիմադիր պատգամավորը: