Ձեր վստահելի աղբյուրը

«Ո՞վ է այս ծանրագույն ողբերգության հիմնական պատասխանատուն և մեղավորը: Դուք՝ որպես երկրի գրեագույն-գլխավոր հրամանատար ձեզ մեղավոր ճանաչո՞ւմ եք, թե ոչ, թե սա էլ «ես մեղավոր չեմ՝ ինձ սխալ էին զեկուցել շարքից է»,-խորհրդարանում Նիկոլ Փաշինյանին հարցրեց «Հայաստան» դաշինքի պատգամավոր Արմենուհի Կյուրեղյանը՝ հիշեցնելով Ջրականի հայտնի ձախողված օպերացիան և ռուսական ՌԲԿ հեռուստաընկերությանն այդ օրը տված հարցազրույցում գործողության վերաբերյալ տված տեղեկությունները: 

Արմենուհի Կյորեղյանը հայտնեց, որ Փաշինյանի հայտարարած շատ հաջող ռազմական գործողության արդյունքում ունեցել ենք հարյուրավոր զոհեր և կրել նյութատեխնիկական մեծ կորուստ, իսկ ադրբեջանաթուրքական կողմը ստացել է մեծ առավելություն:

«Ես այս ամբիոնից տասնյակ անգամ եմ ասել, որ այդ ամենի մեղավորն էլ, պատասխանատուն էլ ես եմ, 100 անգամ եմ ասել նախընտրական քարոզարշավում, չգիտեմ էլ քանի անգամ պետք է ասեմ»,-արձագանքեց Փաշինյանը և հայտնեց, որ հոկտեմբերի 5-ին եղել է Ստեփանակերտում և իրեն առաջարկել են (Սամվել Բաբայանը) օպերացիան, և ինքը զինվորականներին առաջարկել է գնահատել առաջարկը:

«Լելե Թեփե ես չեմ ասել, այդ արտահայտությունը հետո է մտել պրոպագանդիստական նկատառումներով, թե իբր ես ասել եմ, թե Սերժ Սարգսյանը 2016 թվականին Լելե Թեփեն կորցրել է, այն ինձ համար ունի քաղաքական նշանակություն, գնացեք դիրքը վերցրեք, որ քաղաքական դիվիդենտ առաջանա… դա կատարյալ անհեթհեթություն է»,-պատասխանեց Փաշինյանը:

«Դուք ինչպես միշտ հմտորեն հարցը շրջանցում եք և բերում այն համատեքստին, որը ձեր ցանկալին է: Ես ձեզ չխնդրեցի բացատրել՝ Լելե Թեփե են ասել, թե այլ բան, այլ հարցրեցի, թե դուք ձեզ մեղավոր ճանաչում եք, դուք էլ ասացիք՝ այո ճանաչում եք և նորից ամրապնդեցիք այն ենթատեքստը, որ դուք մեղավոր չեք՝ ձեզ սխալ են զեկուցել»,- արձագանքեց ընդդիմադիր պատգամավորը և հարցրեց, թե հոկտեմբերի 7-ին հրադադարի առաջարկը մերժելու համար, ով է պատասխան տալու և ինչպես է նայելու ծնողների աչքերին,  որոնց զավակները զոհվեցին դրանից հետո:

«Նման քայլի գնացիք, որ ձեզ դավաճան չասե՞ն, միևնույն է՝ այսքանից հետո ձեզ համ դավաճան են անվանում, համ կապիտուլյանտ»,-հայտարարեց «Հայաստան» խմբակցության պատգամավորը:

Նիկոլ Փաշինյանը պնդեց, որ ընդդիմադիրներին ավելի մեծ դավաճան ու կապիտուլյանտ են անվանում և ընտրությունների արդյունքունքները դրա մասին են վկայում:

«Ձեր դավաճան ու կապիտուլյանտ լինելու մասին, կարծում եմ, առաջիկայում ավելի մանրամասը քննարկում կունենանք»,-հայտարարեց Նիկոլ Փաշինյանը և հավելեց. «Ես ինձ մնեղավոր եմ ճանաչում 2018 թվականից հետո բանակը կոռումպացված տարրից չազատելու համար»:

Նա նաև հայտնեց, որ հոկտեմբերի 7-ի հրադադարին Հայաստանը կողմ է եղել, բայց Ադրբեջանը պայմանավորվածությունը չի պահպանել:

Այդ պահին ԱԺ-ում պատգամավորներից մեկը փռշտաց:

Փաշինյանն արձագանքեց՝ դիմելով Կյուրեղյանին. «Այդքան էլ ճիշտ, դուք էլ կարող եք փռշտալ, որպես հաստատում»:

Նիստը նախագահող փոխխոսնակ Ռուբեն Ռուբինյանը Արմենուհի Կյուրեղյանի նախազգուշացում տվեց  ոչ պատշաճ բառապաշար օգտագործելու համար, մեջբերելով «ԱԺ կանոնակարգ» օրենքի 52 հոդվածի 1-ին կետը: