Ձեր վստահելի աղբյուրը

Հոկտեմբերի 1-ից ուժի մեջ է մտել կորոնավարակային համաճարակի դեմ պայքարի նոր քաղաքականությունը, որի համաձայն՝ աշխատանքի ներկայանալիս կամ պետք է պատվաստված լինել կամ երկու շաբաթը մեկ թեստ հանձնել:  Ազգային ժողովում կառավարության հետ հարցուպատասխանի ժամանակ «Հայաստան» խմբակցության անդամ Արեգնազ Մանուկյանն ասաց, որ պատվաստումն  այս պահին աշխարհում  գիտականորեն հաստատված ամենաարդյունավետ միջոցն է համարվում,  բայց եթե  աշխարհի փորձն են կիրառում Հայաստանում, ուրեմն պետք է այն ամբողջությամբ կիրառել:

«Պատվաստման նպատակը  մարդու մոտ հակամարմիններ ձևավորելն է: Բայց եթե մարդը հակամարմիններ ունի՝ ինչո՞ւ պետք է պատվաստվի,  ինչո՞ւ պետք է թեստ հանձնի, արդյո՞ք  հնարավոր չէ վերանայել կառավարության մոտեցումը՝ ըստ որի, եթե մարդը հիվանդանալուց և առողջանալուց հետո բնական ճանապարհով հակամարմիններ  է ստացել և կա դա հավաստող փաստաթուղթ, որոշ ժամանակով ազատվի  թեստ հանձնելու կամ պատվաստվելու պարտավորությունից»,- հարցադրումներն արեց ընդդիմադիր պատգամավորը:

Առողջապահության նախարար Անահիտ Ավանեսյանն ասաց,  այս պահին չկա փաստարկված,  գիտական ապացուցում ունեցող բազա, թե  հակամարմիններ ունենալու սանդղակով որ չափից վերև, ներքև են պաշտպանված լինում, այս սահմանից  հակամարմնիններ ունենալու պարագայում պաշտպանված են կրկնավարակներից, երբ ժամանակի ընթացքում կունենան հետազոտությունների ավելի լուրջ բազա, գուցե կկարողանան տարբերակումներ մցնել:

«Բայց մենք առաջնորդվում ենք գիտական  մոտեցումներով և այս պահին էլ Առողջապահական համաշխարհային կազմակերպության կողմից տրված ուղեցույցի համաձայն  հիվանդանալու և առողջանալու պարագան որևէ ձևով չի խոչընդոտում պատվաստմանը,  հակառակը՝  այն ցուցված է, քանի որ պատվաստումները մեզ պաշտպանում ենք նաև կրկնավարակից, պատվաստումները  շատ ավելի լայն իմունիտետային շերտ են մեզ համար ապահովում»,- նշեց նա:

Ա. Ավանեսյանի խոսքով, պետք է բոլոր հանգամանքները համադրելու արդյունքում հասկանալ՝ հիվանդանալուց հետո կարճ ընթացքում արդյոք ՊՇՌ թեստավորման դրական արդյունքներն ինչքան ժամանակ են պահպանվում:

«Մենք ունենք շատ փոքրաթիվ քանակով դեպքեր, երբ մարդը լավանալուց հետո 20 օր, 30 օր հետո դեռ ՊՇՌ թեստի դրական պատասխան է ունենում: Այս հանգամանքը հաշվի առնելով՝ մեր մասնագիտական խումբը  որոշակի փոփոխությունների և համալրումների աշխատանք է իրականացնում, կտեսնենք, երբ վերջանական եզրակացությունն ունենանք,  ըստ այդմ կդիտարկենք թե հիվանդանալուց, լավանալուց հետո ի՞նչ ժամանակի ընթացքում մենք կպարտադրենք ՊՇՌ թեստավորման պատասխան ներկայացնել կամ պատվաստման հավաստագիրը»,- ասաց առողջապահության նախարարը:

Արեգնազ Մանուկյանը հիշեցրեց նախարարի ավելի վաղ արած հայտարարությունը՝ պատվաստումը չի ապահովում վարակելուց և  վարակվելուց:

«Բայց ձեզ չի խանգարում, որ որոշում կայացենք՝ պատվաստումը պետք է լինի պարտադիր-փակուղային: Իսկ թեստերի մասով ասեմ՝ եթե պետությունը պարտադրում է անել այն, ուրեմն պետք է ֆինանսական բեռն իր վրա վերցնի»,- նշեց պատգամավորը:

Ա. Մանուկյանը բարձրացրեց նաև ՊՇՏ թեստերի գինի՝ կոչ անելով կառավարությանը հետևել գնային քաղաքականությանը, քանի որ այսօր  կոլեկտիվ թեստ հանձնում են 7000 դրամով, մինչդեռ երկու տարի 15 հազար դրամ է եղել թեստի գինը:

«Փաստորեն, թեստ անելը գերեկամտաբեր բիզնես է դարձել կառավարության  անգործության կամ համաձայնության պայմաններում»,- ասաց նա:

Ա. Մանուկյանը պատվաստանյութերի հետ կապված նշեց, որ Հայաստանում ընտրության լայն հնարավորություն չկա, մարդիկ ուզում են ստանալ, օրինակ, Pfizer կամ Moderna, որպեսզի կարողանան նաև մեկնել իրենց նախընտրած երկիրը, սակայն Հայաստանում դեռ չկան այդ պատվաստանյութերը:

Անահիտ Ավանեսյանը հակադարձեց պատգամավորին՝ նշելով, որ Հայաստանում պատվաստանյութերի բավական լայն տեսականի կա, արդեն կա նաև Moderna ընկերության պատվաստանյութը, կլինեն այլ ընկերությունների պատվաստանյութեր ևս:

«Պատվաստանյութը դեղամիջոց է, անհրաժեշտություն է, Հայաստանում առկա բոլոր  պատվաստանյութերը բավարարում են որակի արդյունավետության  չափանիշներին: Եթե անգամ մենք ունենայինք մեկ տիպի պատվաստանյութ, մեր առջև դրված խնդիրը պետք է լուծած համարեինք: Այստեղ հարցը նրանում է, որ պետք է պատվաստումների ցուցանիշը բարելավել, ոչ թե պատվաստանյութերի տեսականին լայնացնեն:

Ես չեմ պնդում, որ պատվաստանյութերը 100 տոկոսով չեն պաշտպանում, ապացուցված են կլինիկական փորձարկումների արդյունքում, պատվաստանյութերն ամենականխարգելիչ միջոցն են, բայց չկա որևէ դեղամիջոց, որը կարող է 100 տոկոսով որևէ բան երաշխավորել»,- ասաց առողջապահության նախարարը: