Ձեր վստահելի աղբյուրը

Եվրասիական տնտեսական հանձնաժողովի խորհուրդը հոկտեմբերի 5-ի նիստին հաստատել է ԵԱՏՄ ներքին շուկայում առկա բացառումների ու սահմանափակումների վերացման մասով նախագիծը (ճանապարհային քարտեզը):

Եվրասիական տնտեսական հանձնաժողովից մանրամասնում են՝ փաստաթուղթը, որը նախանշված է մինչև 2022 թվականի դեկտեմբերը ներառյալ, պարունակում է 35 միջոցառում:

«Հանձնաժողովի և Միության երկրների պետական իշխանության մարմինների ներկայացուցիչների արդյունավետ աշխատանքի արդյունքն արտացոլվեց նոր ճանապարհային քարտեզում: Այն միջնաժամկետ ռազմավարական նախագծման առանցքային փաստաթղթերից մեկն է, որն ուղղված է ԵԱՏՄ երկրների կառավարությունների ղեկավարների կողմից նշված առավել էական խոչընդոտների վերացմանը: Ճանապարհային քարտեզի իրականացումը կապահովի ինտեգրացիոն գործընթացների զարգացումն ու ընդարձակումը՝ Միության ներքին շուկայի գործարկումն էլ ավելի կայուն դարձնելով», ‒ նշել է Ներքին շուկաների, տեղեկատվայնացման, տեղեկատվական-հաղորդակցական տեխնոլոգիաների հարցերով նախարար Գեղամ Վարդանյանը:

Ճանապարհային քարտեզի միջոցառումների իրականացման ընթացքում նախատեսվում է մասնավորապես վերացնել 14 խոչընդոտ. 13 սահմանափակում և 1 բացառում:

Նշվում են, որ ցուցակում առկա են խոչընդոտներ՝ կապված գիտական աստիճանների ու կոչումների փաստաթղթերի, վարորդական վկայականների ճանաչման, ուժեղ ազդող նյութերի շրջանառության և մշակութային արժեքների հետ, ինչպես նաև Միության ներքին շուկայում առկա այլ նշանակալի խոչընդոտներ:

Առաջին արդյունքների վերաբերյալ զեկույցը կներկայացվի 2021 թվականի նոյեմբերին Եվրասիական միջպետական խորհրդի նիստին: