Ձեր վստահելի աղբյուրը

«Տեսակցությունները փակ են Առուշան Առուշանյանի և Մանվել Փարամազյանի հետ»,-Աժ-ում լրագորղներին հայտնեց «Հայաստան» խմբակցության պատգամավոր Աննա Գրիգորյանը և հույս հայտնեց, որ Գորիսի իրենց սիրելի քաղաքացիները, գնահատելով կատարված աշխատանքը, ճիշտ ընտրություն կանեն ՏԻՄ ընտրություններում առաջադրված Առուշան Առուշանյանի օգտին:

Նա պնդեց, որ Առուշանյանի հանդեպ քաղաքական հետապնդում է իրականացվում և նա կալանքի տակ է, քանի որ ձերբակալված Քարահունջ գյուղի գյուղապետ Լուսինե Ավետյանը գրել է իրարից տարբերվող մի քանի ցուցմունք և վերջինով էլ կալանավորել են Առուշան Առուշանյանին և բաց թողել գյուղապետին:

Նա տեղեկացրեց, որ Գորիսի համայնքապետին ձերբակալել են նրա համար, որ Քարահունջի գյուղացիներին դրամական օգնություն է բաժանել ընտրություններից մի քանի ամիս առաջ, այն դեպքում, երբ գյուղը սահմանամերձ էր և պատերազմից հետո բազմաթիվ կարիքավորներ կային:

Ընդդիմադիր պատգամավորը հայտնեց, որ վերջերս պարզել են, որ կառավարության միջգերատեսչական աշխատանքային խումբ կա, որին իրենք չեն տեսել,  բայց վերջինս բազմաթիվ խնդիրներ է հայտնաբերել, և այդ պատճառով պետք է ՀՀ Սյունիքի մարզին մեկ միլիարդ դրամ տրամադրի հենց ՏԻՄ ընտրություններից առաջ։

«Այստեղ կոռուպցիոն որևէ ռիսկ չե՞ք տեսնում։ Պարոն Առուշանյանն էլ էր խնդիրներ լուծում, ինչո՞ւ եք նրան կալանավորել, իսկ  Արմեն Խաչատրյանի և մյուսների համար որևէ խնդիր չեք տեսնում»,- նկատեց «Հայաստան» խմբակցության պատգամավորը։

Ընդդիմադիր պատգամավորը կրկին շեշտեց, որ Առուշան Առուշանյանի նկատմամբ հստակ քաղաքական հետապնդում է իրականացվում, քանի որ մեղադրվում է աջակցության խնդրանքով դիմած կարիքավոր մարդկանց պատերազմից հետո համայնքապետարանի կողմից ֆինանսական աջակցություն է ցուցաբերելու մեջ :

«Հիմա ասում են, որ այն կաշառք է եղել, այն էլ՝ ընտրություններից մի քանի ամիս առաջ, երբ դեռ այն ժամանակ չէր էլ խոսվում ընտրությունների մասին»,-նկատեց Աննա Գրիգորյանը։