Ձեր վստահելի աղբյուրը

«Հայաստան» խմբակցության պատգամավոր, դաշնակցական Արթուր Խաչատրյանն ԱԺ-կառավարություն հարց ու պատասխանի ժամանակ  գործադիրի անդամներից հետաքրքրվեց Հայաստան-Ադրբեջան սահմանգծման ու սահմանզատման գործընթացի մասին։

«Որպես սահմանների գծման բազմիցս նշվում են սովետական քարտեզները։ Նախորդ քառօրյային ես մեջբերեցի Ադրբեջանի անկախության մասին սահմանադրական ակտի դրույթները, որոնց համաձայն Ադրբեջանն ինքը չի ճանաչում նախկին սովետական սահմանները։ Կառավարությունը խոստացավ այդ հարցն ուսումնասիրել։ Այժմ ինձ հետարքրում է ՀՀ կառավարության դիրքորոշումը»,-ասաց դաշնակցական գործիչը։

Նա հիշեցրեց, որ Խորհրդային Միության անդամ հանրապետությունների սահմանները 70 տարիների ընթացքում անընդհատ փոփոխվել են, օրինակ Ալ լճերը Ադրբեջանին են հանձնվել 1920-ական թվականների կեսերին։

«Սովետական Հայաստանը, որի հիման վրա ստեղծվել է Հայաստանի Հանրապետությունը, ներառում է ԼՂԻՄ հինգ շրջանները և Շահումյանի շրջանը։ Հիմա հարցս։ Եթե Հայաստանի կառավարությունն առաջնորդվել է կամ առաջնորդվում է սովետական սահմաններով, արդյոք սահմանգծման ու սահմանզատման գործընթացի շրջանակում պահանջե՞լ կամ պահանջելո՞ւ է Ադրբեջանից իր զորքերը դուրս հանել Լեռնային Ղարաբաղից՝ ԼՂԻՄ-ից և Շահումյանի շրջանից, որոնք 1989 թվականի դեկտեմբերի 1-ից Հայաստանի մաս են կազմում»,-հարցրեց ընդդիմադիր պատգամավորը։

Պատասխանի համար ամբիոնին մոտեցավ փոխվարչապետ Մհեր Գրիգորյանը։

«Նման գործընթացներում, թե նախապատրաստական փուլում, թե հատագայում՝
իրականացման փուլում նախ և առաջ կարևոր են ոչ թե քարտեզները, այլ այն իրավական ակտերը, որոնք  վավեր են, իրավազոր են, որոնց հիման վրա կազմվել են քարտեզները»,-ասաց Փաշինյանի տեղակալը։

Նրա խոսքով, ամբողջական ու համպարփակ հիմքերի հետազոտությունից հետո նոր պարզ կդառնա, թե սխեմատիկ առումով որ քարտեզը հիմք կհանդիսանա գործընթացներ կազմակերպելու և սկսելու համար։

Արձագանքելով կառավարության ներկայացուցչի՝ դաշնակցական Խաչատրյանն ասաց.

«Համաձայն եմ, իհարկե, որ բոլոր իրավական հիմքերը պետք է ուսումնասիրել և նոր զորքերը դուրս բերել նոյեմբերի 9-ին ձևավորված շփման գծից։ Իսկ Ձեր խոսքի առաջին մասին ի պատասխան հիշեցնեմ, որ 1990 թվականի մայիսի 20-ի ընտրություններին մասնակցել է ԼՂԻՄ ժողովուրդը՝ Շուշիի շրջանից, որն այդ ժամանակ ադրբեջանական վերահսկողության տակ էր և Շահումյանի շրջանի ժողովուրդը։ Դրանից բացի  չեն չեղարկվել ոչ 1990 թ. դեկտեմբերի 1-ի որոշումը, ոչ էլ դրա հիման վրա կազմված ՀՀ Անկախության հռչակագիրը, ոչ էլ  1991 թ. սեպտեմբերի 23-ի որոշումը, ուստի դրանք ուժի մեջ գտնվող ու գործող իրավական ակտեր են»,-ասաց օրենսդիր մարմնի ներկայացուցիչը։

Գործադիրի ղեկավարի տեղակալը նկատեց՝ շատ ավելի լավ։
Այսինքն՝ տեղյա՞կ չէր։

«Հնարավոր չէ սելեկտիվ վերաբերվել գործող ու իրավազոր ակտերին, իհարկե, դրանք պետք է վերլուծվեն ամբողջության մեջ։ Բոլորն էլ այդ պրոցեսում կիրառելի են։ Այլ հարց է, թե այդ իրավական ակտերի կոնֆլիկտն ինչ տեսք կունենա, մաքսիմալ պետք է հետազոտվեն և բացահայտվեն այն ակտերը, որոնք երկկողմ համաձայնեցված են եղել, որոնց հիման վրա քարտեզագրում է իրականացվել»,-ասաց Մհեր Գրիգորյանը։