Ձեր վստահելի աղբյուրը

«Մենք ընտրությունների անցկացման երեք օր ունենք՝ հոկտեմբերի 17, նոյեմբերի 14 և դեկտեմբերի 5, որի արդյունքում ՀՀ-ում կունենանք 79 համայնք՝ ներառյալ Երևանը, Գյումրին և ազգային փոքրամասնությամբ բնակեցված 5 համայնքը»,- կառավարության նիստում հայտնեց տարածքային կառավարման և ենթակառուցվածքների նախարար Գնել Սանոսյանը:

Նա  նշեց, որ նախորդ օրը կառավարությունը գրավոր ընթացակարգով երկու որոշում կայացրեց, քանի որ դեկտեմբերի 5-ին նշանակված են ՏԻՄ ընտրություններ և 60-օրյա ժամկետը պետք է պահպանվեր:

Գնել Սանոսյանը տեղեկացրեց, որ որոշումների արդյունքում Հայաստանում ձևավորված 
79 համայնքից 7-ը որևէ մեկի հետ միավորված չեն լինի. մնացած 72-ը համայնքային փնջերում են ընդգրկված լինելու:

«Նախորդ օրվա մեկ որոշմամբ մենք 441 համայնք միավորեցինք 38 համայնքային միավորի փնջերի մեջ և այնտեղ դեկտեմբերի 5-ին համամասնական ընտրակարգով ընտրություններ կանցկացվեն:

Նախարարը տեղեկացրեց, որ երկրորդ որոշմամբ Արագածոտնի մարզի Արևուտ և Մեծաձոր համայնքներում նույնպես ընտրություններ տեղի կունենան, բայց քանի որ այդ համայքներում ընտրողների թիվը 4000-ից քիչ է, ապա այդ երկու համայնքներում ընտրությունները կանցկացվեն մեծամասնական ընտրակարգով:

Նա տեղեկացրեց, որ երկու համայնքն էլ ազգային փոքրամասնություններով են բնակեցված, բայց խոշորացվող են:

Ըստ Սանոսյանի՝ հոկտեմբերի17-ին համամասնական ընտրակարգով ընտրություններ կկայանան նախկինում խոշորացված Գյումրի, Գորիս, Տաթև, Տեղ, Մեղրի համայքներում, իսկ մեծամասնական ընտրակարգով՝ Շամիրամ, Ֆերիկ  և Ֆիոլետովո համայնքներում:

Տարածքային կառավարման և ենթակառուցվածքների նախարարը հայտնեց, որ նոյեմբերի 14-ին համամասնական ընտրակարգով ընտրություններ կանցկացվեն Իջևան, Ստեփանավան և Կապան արդեն խոշորացված համայնքներում, իսկ մեծամասնական ընտրակարգով՝ Արզնի և Լերմոնտով համայնքներում: