Ձեր վստահելի աղբյուրը

«Անմարդկային մոտեցում է՝ Շուշին գնահատել, «չափել» նյութական ցուցիչներով։ Մի կողմ թողնենք, որ Շուշին ռազմավարական առումով տարածաշրջանի ամենագլխավոր կետերից մեկն է, որի հանձնումն ընդհանուր տարածաշրջանի համար աղետալի հետևանքներ ունի և ունենալու է»,- ասուլիսում ասաց Ադրբեջանի հարցերով փորձագետ Անժելա Էլիբեգովան՝ անդրադառնալով Շուշիի վերաբերյալ Նիկոլ Փաշինյանի վերջին հայտարարություններին։ 

Նա նշեց, որ բացի այդ, Շուշին մեզ համար խորհրդանիշ է, մեր մշակութային, կրոնական կենտրոններից է. «Երբ գնահատում է՝ քանի շենք է կառուցվել, քանիսը չի կառուցվել, ակնհայտ է դառնում, որ այդ անձնավորությունը Շուշիում առաջին պատերազմից հետո չի եղել, չի տեսել Շուշին առաջին պատերազմից հետո»։

Ադրբեջանագետի խոսքով, եթե Փաշինյանն իր գործունեության ամբողջ ընթացքում մի փոքր նեղություն տար իրեն ու նայեր արխիվային կադրերը, ապա կտեսներ, որ Շուշիի ազատագրումից հետո զրոյից կառուցվել է։

«Օրինակ, եթե նայեր ու տեսներ, թե ինչ վիճակում էր Սուրբ Ղազանչեցոց եկեղեցին, ինչ էին այդ եկեղեցու հետ արել ադրբեջանցիները, ինչ կանեն նորից, որովհետև իրենց էությունը չի փոխվում, ապա պարզ կդառնար, որ Շուշին զրոյից նորից վերակառուցվել է։ Բայց այդ ամենն էական չէ, որովհետև եթե այնտեղ նույնիսկ որևէ շենք չէր կառուցվել, ապա չի նշանակում, որ Շուշին պետք էր հանձնել։ Դա աբսուրդ է», - ասաց Անժելա Էլիբեգովան։

Փորձագետը նշեց, որ ադրբեջանական քարոզչական թեզերը պարբերաբար, անընդհատ համառորեն լսվում է ՀՀ կառավարության, իշխող կուսակցության պատգամավորներից։

«Հարց է առաջանում՝ կամ բոլորը գժվել են, կամ այդ մարդիկ իսկապես կատարում են Ադրբեջանի բոլոր պահանջները և մեզ հրամցնում ադրբեջանական օրակարգը։ Երբ մի բանը տասնյակ անգամներ կրկնվում է,  հասկանում ես, որ կա միտում՝ այդ մարդիկ ակնհայտորեն Հայաստանի ներսում մեզ քարոզում են ադրբեջանական թեզերը։ Ալիևը մի բան է ասում, մեկ շաբաթ անց այդ նույն թեզերը լսում ես մեր իշխանավորների շուրթերից։ Դա չի կարող նորմալ լինել»,- ասաց Ա. Էլիբեգովան։

Նա ընդգծեց՝ Ադրբեջանը և Թուրքիան կանգ առնելու որևէ պատճառ չունեն։

«Ադրբեջանը միակ լեզուն, որ հասկանում է՝ վախն էր հայկական բանակից ու ամուր պետականությունից։ Հենց սա էր, որ տարիներ շարունակ թույլ չէր տալիս Ալիևին ոչ աքլորանար ու լպիրշ արտահայտություններով խոսեր հայերի, ՀՀ ղեկավարների մասին, բայց երբ մեկ-երկու  անգամ փորձում է ու որևէ հակազդեցություն այստեղ չկա, իր հռետորաբանությունը դառնում է արդեն բոլոր մարդկային նորմերից դուրս։

Այստեղի իշխանություններն իրենց ոչ միայն չեն պատասխանում, մի հատ էլ ասում են՝ պատրաստ ենք ձեր բոլոր պայմանները կատարենք, որպեսզի տարածաշրջանում խաղաղություն լինի, միայն թե մեր իշխանությունը պահենք»,- ասաց ադրբեջանագետը։

Նա նշեց, որ Ադրբեջանում ՀՀ ներկա իշխանության ստորացումն ակտիվորեն շարունակվում է, հայատյացության և հակահայկական քարոզչության մակարդակը ոչ միայն չի իջել Ադրբեջանում, գնալով ահագնանում է։