Սերգեյ Մարկեդոնով. Հակամարտությունը բացառապես ղարաբաղյան չէ
«Սխալ է հակամարտությունն անվանել ղարաբաղյան, այն հայ-ադրբեջանական հակամարտություն է՝ հաշվի առնելով կոնֆլիկտային կետերը՝ Շահումյանը, Խանլարը, Գետաշենը, Մարտունաշենը, այսօր էլ՝ Սյունիքի և Գեղարքունիքի սահմանամերձ շրջանները»,- Կովկասի ինստիտուտի կազմակերպած «Կովկասը XXI դարում» միջազգային գիտաժողովին ասաց ռուս քաղաքագետ, Մոսկվայի միջազգային հարաբերությունների պետական ինստիտուտի (ՄԳԻՄՕ) Միջազգային հետազոտությունների ինստիտուտի Եվրոատլանտյան անվտանգության հարցերով կենտրոնի առաջատար գիտաշխատող Սերգեյ Մարկեդոնովը։
Նա նշեց, որ հակամարտությունը բացառապես ղարաբաղյան չէ, Ղարաբաղը պարզապես գլխավոր խորհրդանիշն էր:
Ինչ վերաբերում է հակամարտության ավարտվելուն, քաղաքագետը նշեց, որ որպես փորձագետ, կարծում է, այն ավարտված չէ. «Ես այդպես եմ կարծում որպես մասնագետ, ոչ թե որովհետև ես Երևանում եմ կամ որովհետև ես հայամետ դիրքորոշում ունեմ, ինչպես որոշ մարդիկ են կարծում: Հակամարտության ավարտը խաղաղության համաձայնագիրն է»։
Սերգեյ Մարկեդոնովի խոսքով, արդյոք ավարտված է հակամարտությունը, թե ոչ, պետք է հաշվի առնել չափանիշները։
«Ավարտված է համարվում, եթե կա խաղաղության պայմանագիրը, որը քիչ թե շատ երկու հասարակություններում լեգիտիմ է։ ՄԵնք չենք տեսնում լեգիտիմություն ոչ միայն Հայաստանում, Ադրբեջանում վիճակն այդ առումով ավելի բարդ է:
Կարո՞ղ ենք ասել, որ ադրբեջանական հասարակությունը ամբողջությամբ և մինչև վերջ ընդունել է պատերազմի արդյունքները: Ոչ: Ես հասկանում եմ Իլհամ Ալիևի տրամաբանությունը: Եթե ես լինեի Իլհամ Ալիևի տեղը, ես էլ կասեի՝ ամեն ինչ ավարտված է, ես մտա պատմություն, ես դասագրքերում եմ։ Նրա տրամաբանությունը միանգամայն հասկանալի է, բայց ևս մեկ անգամ ասում եմ՝ չի կարելի ասել, թե հակամարտությունը դրանով ավարտվել է», - ասաց Ս. Մարկեդոնովը:
Նրա խոսքով, Լեռնային Ղարաբաղի կարգավիճակի մասին, միևնույն է, խոսում են և ոչ միայն Հայաստանում. «Մինսկի խումբն էլ է ասում, որ կարգավիճակը մինչև վերջ հստակեցված չէ: Քանի դեռ այդ հարցերը լուծված չեն, չենք կարող խոսել, որ հակամարտությունն ավարտված է։
Ես ասացի, որ հակամարտությունը միայն ղարաբաղյան չէ, հայ-ադրբեջանական է: Այն, ինչ հիմա տեսնում ենք՝ կապված սահմանագծման և սահմանազատման հարցերի հետ, ցույց է տալիս, որ հարցերը լուծված չեն»,- ասաց ռուս քաղաքագետը։
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
