Ձեր վստահելի աղբյուրը

Լեհաստանի Սահմանադրական դատարանը որոշել է, որ Եվրամիության որոշ օրենքներ հակասում են Լեհաստանի Սահմանադրությանը։ Այս մասին գրում է Euronews-ը։

Բրյուսելում զայրույթ առաջացրած այս որոշումը, ամենայն հավանականությամբ, ավելի կվնասի Լեհաստանի հարաբերություններին 27 անդամներից կազմված դաշինքի հետ։ Արդեն օգտագործվում է Բրեքսիթի համարժեք բառը՝ ԵՄ-ից Լեհաստանի դուրս գալու համար՝ Պոլեքքսիթ։

Վարշավայի Սահմանադրական դատարանը վճռեց, որ ԵՄ պայմանագրերի որոշ դրույթներ և ԵՄ դատարանների որոշ վճիռները հակասում են Լեհաստանի բարձրագույն օրենքին:

Դատավորները գտել են, որ Եվրամիությանը երկրի անդամակցությունը ԵՄ-ին չի տալիս գերագույն իրավական լիազորություններ և չի նշանակում, որ Լեհաստանը իր ինքնիշխանությունը փոխանցել է ԵՄ-ին: Նրանք նշել են, որ Լեհաստանի ոչ մի պետական մարմին չի համաձայնի իր լիազորությունների արտաքին սահմանափակմանը:

Եվրահանձնաժողովի նախագահ Ուրսուլա ֆոն դեր Լեյենը, արձագանքելով այսօր առավոտյան կայացված վճռին, ասել է, որ ինքը «խորապես մտահոգված է» և հանձնարարել է «մանրակրկիտ և արագ» վերլուծել այն՝ որոշելու, թե ինչ քայլեր պետք է ձեռնարկվեն:

«Մեր գերակա առաջնահերթությունն է ապահովել, որ Լեհաստանի քաղաքացիների իրավունքները պաշտպանված լինեն, և որ Լեհաստանի քաղաքացիները օգտվեն Եվրոպական միության անդամակցության իրավունքներից, ինչպես և մեր միության բոլոր քաղաքացիները։ Ավելին, ԵՄ քաղաքացիներին, ինչպես նաև Լեհաստանում բիզնես իրականացնող ընկերություններին անհրաժեշտ է իրավական վստահություն, որ ԵՄ կանոնները, ներառյալ Եվրոպական դատարանի վճիռները, լիովին կիրառվում են Լեհաստանում», - ասել է ֆոն դեր Լեյենը,  շեշտելով ԵՄ օրենքների գերակայությունը ազգային օրենսդրության նկատմամբ՝ ներառյալ սահմանադրական դրույթների։