Մեծ «վստահություն» վայելող իշխանությունը չի կարողանում հասարակությանը համոզել պատվաստվել. Արամ Վարդևանյան
«Իշխանության բանախոսները վերջին օրերին պատվաստման վատ պատկերի պատճառների սլաքն ուղղում են ընդդիմությանը՝ հերթական անգամ փորձելով խուսափել պատասխանատվությունից»,- ԱԺ-ում կազմակերպված ճեպազրույցի ժամանակ հայտարարեց «Հայաստան» խմբակցության պատգամավոր Արամ Վարդևանյանը:
Պատգամավորը հայտնեց, որ ընդդիմությունը դիմել է ՍԴ առողջապահության նախարարի հրամանի իրավաչափությունը պարզելու համար, քանի որ սոցիալ-տնտեսական ներկայիս պայմանները չեն ենթադրում նման անհամաչափ ծախսային բեռ մեր հայրենակիցների վրա:
Վարդևանյանը ողջամիտ համարեց 14 օրը մեկ աշխատող քաղաքացուց ՊՇՌ թեստի պահանջը, բայց նորմալ չհամարեց, որ այն անում են քաղաքացու հաշվին:
Նշելով, որ Եվրոպայում նույնպես այդ մոդելը ներդրվել է, բայց ՊՇՌ-ի համար ծախսերը պետությունն է հոգացել՝ պատգամավորն ասաց. «Այսինքն, իմանալով, որ մեր հայրենակիցներն ունեն սոցիալ-տնտեսական բարդ պայմաններ, նորմալ չէ՝ նրան նաև հարկադրես, որ կամ իր աշխատավարձի մի ստվար հատվածը տա ՊՇՌ տեստին, կամ որպես այլընտրանք պատվաստվեն»:
Իրավաբան պատգամավորը պնդեց, որ այդ մոտեցումը հարկադրանք է:
Արամ Վարդևանյանը հայտնեց, որ «Հայաստան» դաշինքը հայտարարել է՝ կողմ է պատվաստմանը, որը կորոնավիրուսի համավարակի դեմ պայքարի միակ միջոցն է:
Նա ասաց, որ պատվաստումն ունի որոշակի բարդություններ, բայց համաշխարհային փորձը ցույց է տվել, որ ճիշտը պատվաստվելն է:
«Ինչպես է ստացվում, որ խաղաղության օրակարգ ձևավորելու, թշնամուն՝ թշնամի չասելու մանդատ ստացած իշանությունը չի կարողանում այդ նույն վստահությունը վայելել հանրության մոտ՝ պատվաստելու հարցում»,- հայտարարեց ընդդիմադիր պատգամավորը և հավելեց, որ այն վստահության մակարդակը, որ իշխանությունները փորձում են մշտապես ներկայացնել, իրականում այդ մակարդակին չէ:
«Հայաստան» դաշինքի անդամը պնդեց, որ իշխանությունը կոմունիկացիոն ճիշտ ռազմավարություն չի տանում հանրության հետ և համոզիչ չի բացատրում, թե ինչի համար է պետք պատվաստվել:
Պատգամավորը բերեց Դանիայի օրինակը, որտեղ անհամաչափ հակասահմանադրական միջոցներով հասարակության չեն ստիպել, որ պատվաստվեն, այլ ճիշտ կոմունիկացիա են իրականացրել, հավաքել են բոլոր քաղաքացիների բազան և նրանց հետ հաղորդագրություններով են շփվել:
Արամ Վարդևանյանը նկատեց, որ ի տարբերություն Եվրոպայի՝ Հայաստանում խոսում են ձերբակալելու և կալանավորելու մասին:
Նա հայտնեց, որ իշխանություններն արդյունավետ չեն պայքարում համաճարակի դեմ և նկատեց, որ եթե հիվանդանոցային պայմաններն անբավարար են, ապա այսօր իշխանությունները պետք է առնվազը պարգևատրումները կանգնեցնեին և հիվանդանոցի նախագիծ սկսեին:
Լրահոս
Տեսանյութեր
Գրետա Թունբերգ. Երկերեսանիություն ու կեղծավորություն է, որ COP29-ը տեղի է ունենում Ադրբեջանում
