Ձեր վստահելի աղբյուրը

«2019 թ.-ին ՌԴ-ն ներկայացնող տնտեսվարող սուբյեկտների հաղթած մրցույթների ընդհանուր ծավալը 2 մլրդ դրամ է եղել, այն 2.5 անգամ աճել է 2020 թ.-ին 2021 թ.-ի առաջին կիսամյակում արդեն 1 մլրդ 150 մլն դրամի է հասել»,- Տարածաշրջանային և Եվրասիական ինտեգրման հարցերի մշտական հանձնաժողովի  նիստում հայտնեց էկոնոմիկայի նախարարի տեղակալ Ավագ Ավանեսյանը՝ ներկայացնելով ՀՀ-ի գնումների գործընթացում ԵԱՏՄ երկրների տնտեսվարողների մասնակցության վիճակագրությունը:

Փոխնախարարի տեղեկացմամբ՝ ՌԴ տնտեսվարողները ՀՀ պետական գնումներին մասնակցելու համար 2019 թ.-ին ներկայացրել են 243 հայտ, 2020 թ.-ին՝ 185  և 2021 թ.-ի առաջին կիսամյակում՝ 22 հայտ:

Ավագ Ավանեսյանի խոսքով՝ Ղազախստանը 2019 թվականին Հայաստանի պետական գնումների գործընթացում  ունենցել է 1 հայտ, որի ծավալը եղել է մոտավորապես 38 մլն դրամ:

Նրա խոսքով դրանից հետո այդ երկիրն այլևս չի մասնակցել ՀՀ պետական գնումներին, նրա փոխարեն մասնակցել են Բելառուսի տնտեսվարողները, մասնավորապես՝ 2019 թ. այդ երկրից եղել է 1 հայտ՝ 1 մլն 250 դրամ արժողությամբ:

Տարածաշրջանային և Եվրասիական ինտեգրման հարցերի մշտական հանձնաժողովի նախագահ, «Հայաստան» խմբակցության անդամ Արմեն Գևորգյանը հետաքրքրվեց, թե ի՞նչ պետք է արվի, որպեսզի բարձրացվի Հայաստանի տնտեսվարողների կարողությունները  ՌԴ-ում պետական գնումներին մասնակցելու համար, որտեղ տարեկան 100 մլրդ դոլարից ավել արժողությամբ գնումներ են իրականացվում:

Նիստին ներկա էկոնոմիկայի մյուս փոխնախարարը՝ Վարոս Սիմոնյանը, հայտնեց, որ նախարարությունում ստեղծված է ներդրումների աջակցման կենտրոն, որն օգնում է տնտեսվարողներին:

«Սա մեր կողմից չիրացված հնարավարություն է և լուրջ տնտեսական մոդելավորում պետք է անենք, քանի որ տասնյակ միլիարդների հնարավորություն է բացվում մեր տնտեսության համար»,-փոխնախարարին արձագանքեց Արմեն Գևորգյանը և պնդեց, որ պետք է տարբեր նախարարություններում կազմակերպական լուծումներ գնտել, որպեսզի առաջիկա 1-2 տրվա ընթացքում ԵԱՏՄ այլ երկրների գնումներին հայ տնտեսվարողների մասնակցության գործընթացը հասցվի ինքնակառավարման աստիճանի, որից հետո դրանք կընթանան իրենց հունով: