Ձեր վստահելի աղբյուրը

«Այս պարագայում եթե իշխանության նպատակն է՝ ինտրիգներ ստեղծել, շոուի հնարավորություն ապահովել, ապա մենք նպատակ չունենք մտնելու այդ խաղի մեջ»,- այսօր խորհրդարանում հրավիրված ասուլիսին ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանն՝ անդրադառնալով Պաշտպանության և անվտանգության հարցերի մշտական հանձնաժողովի նախագահի տեղակալի պաշտոնի ընտրության հարցը ՔՊ պատգամավորների կողմից 6 անգամ տապալելու փաստին:

Նա հիշեց, որ ԱԺ ձևավորումից հետո ընդդիմությունն առաջադրել է ԱԺ փոխնախագահ, 3 հանձնաժողովի նախագահներ, 12 փոխնախագահի թեկնածու և խնդիր չի եղել: 

Պատասխանելով լրագրողի դիտարկմանը, թե իշխանությունը Պաշտպանության և անվտանգության հարցերի մշտական հանձնաժողովի նախագահի տեղակալի թեկնածու Արթուր Ղազինյանին մերժում է, քանի որ նա բանակում չի ծառայել՝ պատգամավորը նկատեց, որ պաշտպանության նախարարի 2 տեղակալներից մեկը նախկին ոստիկան է, մյուսը ներկայացնում է ֆինանսական բլոկը, իսկ պատերազմի ժամանակ Գերագույն գլխավոր հրամանատարը նույնպես չէր ծառայել բանակում։

«Հիմա այս հարցերը դրել են չորրորդ պապկայի մեջ ու ասում են՝ պաշտպանության հանձնաժողովի նախագահի տեղակալը բանակում չի ծառայել: Դա դարձնել առաջնային խնդիր, որևէ ձևով ընդունելի չէ, եթե թեկնածուն ունենար խնդիր, որն օրինական առումով հարցեր էր առաջացնում, իհարկե քննարկման առարկա կդառնար ոչ միայն այդ հարթության մեջ»,- հայտարարեց Աբրահամյանը։

«Պատիվ ունեմ» խմբակցության պատգամավորն անընդունելի համարեց իշխանության մտադրությունը օրենսդրական կարգավորումների ձևով սահմանափակել հանձնաժողովի փոխնախագահի թեկնածուի առաջադրման երկուսից ավելի փորձի դեպքերի համար՝ նկատելով, որ դրանով իշխանությունն օրենսդրական տեսք է փորձում տալ իր ցանկություններին ու քմահաճույքներին։

Տիգրան Աբրահամյանը շեշտեց, որ պատերազմից անցել է 11 ամիս, բայց դեռ հանձնաժողովում ներկայացված չեն ԶՈւ-երի բարեփոխումների հայեցակարգը, արմատական փոփոխությունների չեն ենթարկվել դրա տարբեր բաղադրիչները, այդ թվում՝ մարտական հերթափոխի իրականացումը։

«Այսօր սահմանային տարբեր իրավիճակների քննարկման համատեքստում փոփոխություններ պետք է լինեն, որոնք որևէ ձևով չեն իրականացվում։ Մինչև ՀՀ-ում անվտանգային համակարգը չվերականգնվի, չարդիականացվի, պատշաճ մակարդակի չբերվի, արտաքին քաղաքական բոլոր գործընթացներում Հայաստանը հանդես է գալու զիջողի դիրքերից»,- հայտարարեց Աբրահամյանը: