Ձեր վստահելի աղբյուրը

«Նոր ծրագորվ նախատեսվում է սեպտեմբեր-դեկտեմբեր ամիսներին Արցախից տեղահանված անչափահասներին և 1-ին ու 2-րդ խմբի հաշմանդամներին՝ 50 հազար դրամ, իսկ մյուսներին 25 հազարական դրամ ֆինանսական աջակցություն տրամադրել»,- այսօր կազմակերպված «Տեղահանված ու բռնագրավված Հադրութ.մեկ տարի անց. հիմնահարցեր և մարտահրավերներ»  խորագրով քննարկման ժամանակ հայտարարեց աշխատանքի և սոցիալական հարցերի փոխնախարար Դավիթ Խաչատրյանը:

Նա տեղեկացրեց, որ ծրագիրը դեռ չի ընդունվել, բայց հաստատվելուց հետո նաև սեպտեմբերի  համար կտրամադրվեն գումարներ:

Խաչատրյանի խոսքով՝ 2022 թվականին տեղի կունենա մարդահամար, որի հիման վրա կմշակվի զարգացման ռազմավարություն, որը կիրականացվի 2023 թվականին:  

Պատասխանելով ծրագրերի վերաբերյալ բռնագաղթածների բողոքների մասին հարցին՝ Դավիթ Խաչատրյանը տեղեկացրեց, որ եթե լինում են շահառուների մասսայական բողոքներ, ապա այն հաշվի են առնվում ծրագրերը մշակելիս:

Նա նաև հայտնեց, որ կան բռնագաղթածներ, որոնք վախենում են վերադառնալ Արցախ, բայց ՀՀ իշխանությունները համագործակցում են ԱՀ կառավարության հետ, իսկ վերջինս հայտարարել է, որ բոլոր բռնագաղթածներին բանակարանով պետք է ապահովեն բացառապես Արցախի  տարածքում:

Փոխնախարարի տեղեկացմամբ՝ Արցախի Հանրապետության կառավարության հուլիսի 2-ի թիվ 705 որոշմամբ մի քանի հազար բնակարանի և 3 հազարից ավել բնակելի տների կառուցման ծրագիր է հաստատվել: