Ձեր վստահելի աղբյուրը

«Հայաստանում, ինչպես աշխարհում, կորոնավիրուսով պայմանավորված համաճարակային իրավիճակը բավականին լարված է»,- ասուլիսում ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը։

Նա նշեց, որ վերջին 14 օրվա վերլուծության տվյալները փաստում են՝ նախորդ 14 օրվա հետ համեմատած արձանագրվել է 50 տոկոս դեպքերի աճ, վարակի վերարտադրողականության ցուցանիշը մեկից բարձր է, ինչը խոսում է այն մասին, որ վարակը շատ արագ տեմպերով տարածվում է։

Ռ. Աբովյանի խոսքով, մանկապատանեկան տարիքային բոլոր խմբերում գրանցվել է 1,5-ից մինչև 1,7 անգամ դեպքերի աճ։

«Ըստ Եվրամիության չափանիշների, մենք արդեն մոտենում ենք վառվող կարմիր գոտուն։ Հիվանդացության ցուցանիշը 475 է, եթե հասնենք 500-ի, ապա Հայաստանը կհայտնվի վառվող կարմիր գոտում», - ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետը։

Նա նշեց, որ հիվանդացությունը բարձր է բոլոր մարզերում, հիվանդությունը երիտասարդացել է, հիմնականում, ավելի շատ թիրախավորված են 30-50 տարեկան ազգաբնակչությունը, կան նաև դեպքեր երեխաների շրջանում, որոնք ունեն հոսպիտալացման կարիք ու այս պահին բուժում են ստանում։

Ռ. Աբովյանի խոսքով, հիվանդանոցներն աշխատում են գերծանրաբեռնված, մահճակալային ֆոնդը սպառված է ու դեպքերը բավականին ծանր են։ Նրա գնահատմամբ, իրավիճակը բակավանին մտահոգիչ է։

Հարցին՝ դեպքերի ավելացումը պայմանավորված է նոր շտամի ագրեսիվ մոտեցմա՞մբ, թե՞ պայմանավորված է նոր սահմանափակումներով՝ թեստավորման հետ կապված, ԱՆ ներկայացուցիչը պատասխանեց. «Եթե իրավիճակը լիներ բարվոք, այսինքն ունենայինք ազատ մահճակալներ, կարելի էր ենթադրել, որ առավել շատ դեպքերի թիվը պայմանավորված է թեստավորումներով, բայց հիվանդանոցներ են դիմում այն մարդիկ, որոնք ունեն լուրջ ախտանշաններ, կարիք ունեն բժշկական օգնության և սպասարկման հոսպիտալային պայմաններում։ Սա խոսում է  այն մասին, որ դեպքերն ընթանում են բավականին ծանր, կլինիկական դրսևորումներով»։

Նա հիշեցրեց, որ հիմա սուր շնչառական վարակի սեզոնն է, բարձր ցուցանիշներ են գրանցվում նաև սուր շնչառական վարակների առումով. «Շատ դեպքերում բնակչությունը զգոն չի լինում այն առումով, որ, մտածելով սուր շնչառական վարակ է կամ մարսածություն, բավականին երկար ժամանակ մնում են տանը, շատ դեպքերում ոչ նպատակային բուժում ստանում տան պայմաններում, բավականին  ծանր վիճակներով դիմում հոսպիտալներ, ինչով պայմանավորված է մահացության բարձր ցուցանիշները»։