Ձեր վստահելի աղբյուրը

ԱԺ «Հայաստան» խմբակցության նախաձեռնությամբ անցկացվում է «Տեղահանված ու բռնագրավված Հադրութ. մեկ տարի անց. հիմնահարցեր և մարտահրավերներ» խորագրով հանրային քննարկում։  Մինչ քննարկման անցնելն, ԱԺ պատգամավոր Գեղամ Մանուկյանը խնդրեց մեկ րոպե լռությամբ հարգել 44-օրյա պատերազմի ժամանակ նահատակված հերոսների հիշատակը:

Պատգամավորը հայտարարեց, որ քննարկումը նախաձեռնել են, քանի որ մինչ օրս հստակ չէ Հադրութի անկման հանգամանքները, իսկ բռնագաղթածների սոցիալական խնդիրները լիարժեք չեն լուծվում:

«Այս միջոցառումն անցկացնում ենք չափազանց բարդ իրավիճակում, երբ ՀՀ-ի և ԱՀ-ի շուրջ անվտանգության միջավայրն ավելի փխրուն է դարձել»,- բացման խոսքում ասաց «Հայաստան» խմբակցության ղեկավար Սեյրան Օհանյանը և հավելեց, որ արտաքին և ներքին սպառնալիքներն արդեն Հայաստանի սահմանից ներս են և դոփում են մեր դռները, հետևաբար՝ պետք է համապատասխան որոշումներ ընդունել առկա խնդիրները լուծելու համար:

Նա հայտարարեց, որ արդեն մեկ տարի է անցել Ադրբեջանի սանձազերծած ագրեսիայից, բայց պետության կողմից որևէ գնահատական չի հնչել, քանի որ պետական մարմինների կողմից արվել են բազմաթիվ սխալներ և բացթողումներ և իշխանություններին դժվար է սեփական գործողություններին գնահատական տալ:

Սեյրան Օհանյանի խոսքով՝ հայկական պետությունները միշտ էլ գտնվել են գերտերությունների կիզակետում, բայց այսօրվա վիճակը նախկինից տարբերվում է նրանով, որ Թուրքիան է ներխուժել տարածաշրջան և փորձում է ազդել Հայաստանի և Արցախի վրա՝ իր խնդիրները լուծելու համար:

Պաշտպանության նախկին նախարարը հայտնեց, որ իշխանություններն ավելի շատ ներքին անվտանգությանն են ուշադրություն դարձնում, քան սահմանին տիրող անվտանգային խնդիրներին:

Նրա խոսքով՝ իշխանությունները բավարար աշխատանք չեն տանում նաև պատերազմի հանցագործություններին գնահատական տալու, ինչպես նաև՝ գերիների հարցերին:

Սեյրան Օհանյանը հայտնեց, որ տեղահանվածների խնդիրն առանձնանում է երկու առումով՝ հայրենիքի կորստով և քաղաքացիների սոցիալական խնդիրներով:

«Փառք Աստծո, որ Արցախում են գտնվում ՌԴ խաղաղապահները, բայց նրանց գոյությունն էլ հեռանկարային առումով անորոշության մեջ է գտնվում և մենք պետք է  համատեղ քննարկենք և որոշումներ ընդունենք հետագա անելիքների վերաբերյալ»,- ասաց «Հայաստան» խմբակցության ղեկավարը՝ կարևորելով քննարկման արդյունքում համապատասխան եզրակացությունների հանգելը: